مشرانو جرګه وايي چې د افغان طالبانو مشران دې د مولانا سمیع الحق له وژل کېدو پند او عبرت واخلي.
د مشرانو جرګې یو شمېر غړي وايي، مولانا سميع الحق په پاکستان کې د نړیوالو د فشار کمولو او د افغان سولې په پروسه کې د خڼد رامنځته کېدو په پلمه، د (ای. اېس. ای) له خوا وژل شوی دی.
د دې جرګې د یکشنبې د ورځې ازاد بحث تر ډېره د مولانا سميع الحق د وژنې پر څرنګوالي ور ټول و؛ سناتورانو ویل، که افغان طالبان سولې ته غاړه کښېنږدي، لرې نه ده چې مشران به یې د مولانا سميع الحق په برخلیک اخته شي.
د مشرانو جرګې دويم مرستیال اصف صدیقي وويل، طالبان باید خپله اراده بدله کړي او د سولې له بهیر سره یوځای شي.
د پاکستان د جمعیت علمای اسلام مشر مولانا سمیع الحق د جمعې په ورځ په راولپېنډۍ کې په خپل کور کې د چړو په ګوزارونو په مرموز ډول ووژل شو، تراوسه هم کومې ډلې او یا لوري د دغې وژنې مسوولیت په غاړه نه دی اخیستی.
د مشرانو جرګې غړي وايي چې مولانا سمیع الحق د (ای. اېس. ای) د ځینو کړیو له لوري وژل شوی، څو پر پاکستان د نړیوالو فشارونه کم کړي.
دوی وايي چې د سمیع الحق وژل کېدل به د افغانستان په جګړه او د افغان طالبانو پر چارو اغېزې وکړي.
د مشرانو جرګې دويم منشي فیصل سمیع وايي، که افغان طالبان د مولانا سمیع الحق له وژول کېدو پند وانه خلي، نو د نورو طالب مشرانو او سمیع الحق په برخلیک به اخته شي.
سیاسي کارپوهان هم وایي چې د مولانا سمیع الحق وژل کېدل به له اروایي پلوه پر افغان طالبانو خپل اغېز ولري.
