د فراه د والي ویاند وايي، په دغه ولایت کې د الوتکې د لوېدو په پېښه کې د وژل شویو يو شمېر کسانو جسدونه یې د قومي سپین ږيرو او سره صلیب په همکارۍ د فراه مرکز ته انتقال کړي دي.
په فراه کې د ملي اردو د هلیکوپټر له سقوط نږدې يوه اونۍ تېرېږي، خو لا هم په دغه پېښه کې د وژل شویو يو شمېر کسانو جسدونه لا درکه دي.
د فراه د والي ویاند ناصر مهري پرون رسنيو ته وويل، په دغه پېښه کې د وژل شویو کسانو له ډلې د ۱۲ تنو جسدونه یې تر دې مهاله ترلاسه کړي او د نورو لپاره هم هڅې روانې دي.
د دفاع وزارت یو هلیکوپټر د چهارشنبې په ورځ د فراه په اناردرې ولسوالۍ کې وغورځېد چې له امله يې د ۲۰۷ قول اردو د مرستیال او د هرات د ولایتي شورا د ريیس په ګډون ۲۵ کسان ووژل شول.
دفاع وزارت وايي، ياده چورلکه د زیات وزن او تخنيکي ستونزو له امله غورځېدلې، خو وسله والو طالبانو بیا ويلي چې چورلکه دوی نسکوره کړې.
طالبانو دغه راز ادعا کړې چې د چورلکې د سپرلۍ جسدونه له دوی سره دي او تر هغه به يې کورنيو ته تسليم نه کړي چې حکومت د جنرال رازق د قاتل جسد دوی ته نه وي سپارلی.
د فراه د والي وياند ناصر مهري ويلي، دوی هڅه کوي چې ټول جسدونه د قومي سپین ږیرو او سره صلیب په همکارۍ ترلاسه کړي او که له دې لارې د جسدونو په ترلاسه کولو بريالي نه شي، په عملياتو به لاس پورې کړي.
