هند تر اوسه د مسکو په غونډه کې د ګډون پرېکړه نه ده کړې

هند وايي تر اوسه یې د افغانستان د سولې په اړه د مسکو په غونډه کې د ګډون پرېکړه نه ده کړې. د هندي رسنیو د راپورونو له مخې هندي حکومت ویلي دوی هیله لري چې په افغانستان کې ژر تر ژره روانه جګړه ختمه شي او سوله راشي، خو تر اوسه یې د مسکو په غونډه کې د ګډون هېڅ ډول پرېکړه نه ده کړې. د روسیې د بهرنیو چارو وزارت بیا هیله مندي ښيي چې هند په دغه غونډه کې ګډون وکړي، ځکه تل یې د افغانستان د پرمختګ، سولې او امنیت لپاره کار کړی دی. د مسکو غونډه د را روانې جمعې په ورځ جوړېږي. افغان حکومت په دې غونډه کې ګډون رد کړی دی خو پر ځای یې د سولي عالي شورا پلاوی دغه غونډې ته ورځي. د مسکو په جوړېدونکې غونډه کې د سیمې د هېوادونو د استازو تر څنګ د قطر دفتر غړي هم ګډون کوي. دا به لومړی ځل وي چې وسله وال طالبان د سولې په مخامخ خبرو کې برخه اخلي.