د کندهار یو شمېر قومي مشرانو په یوې غونډه کې د ولسمشرۍ د راتلونکو ټاکنو لپاره د ډاکتر شیدا محمد ابدالي پر نوماندۍ هوکړه وکړه.
دغه غونډه پرون د کندهار ښار په عینو مېنه کې جوړه شوې وه.
غونډې ته د کندهار ولایتي شورا رییس حاجي سید جان خاکرېزوال وویل، د لوی کندهار مخورو له پر له پسې ناستو او مشورو وروسته پرېکړه کړې چې د ولسمشرۍ راتلونکو ټاکنو ته ډاکټر شيدامحمد ابدالي د نوماند په توګه وړاندې شي.
هغه زیاته کړه، په همدې موخه د ولس غږ په نوم د قومي مخورو یو کمېسیون جوړ شوی چې په دې اړه به د کندهار ترڅنګ په نورو ولایتونو کې هم لویې غونډې وکړي او د خلکو ملاتړ به وغواړي.
د غونډې یوه بل ویناوال تورن نېک محمد وویل، لوی کندهار د افغانستان د مشرتوب ادرس دی او ټول یې باید ملاتړ وکړي.
ده یادونه وکړه چې دا د کندهار د مخکیني امنیه قوماندان جنرال عبدالرازق هیله هم وه او په دې برخه کې یې له څو میاشتو راهیسې کار کړی و.
د کندهار د ولایتي شورا غړي نعمت الله شېردلي هم وویل چې دغه پرېکړه د ولس غږ کمېسیون له خوا شوې او دوی ټول له شیدامحمد ابدالي ملاتړ کوي.
د نقیب الله خان په نوم د اروزګان ولایت اوسېدونکي وویل، پر شیدامحمد ابدالي غږ کوي چې د لوی کندهار د خلکو غوښتنه ومني او ځان د ولسمشرۍ راتلونکو ټاکنو ته چمتو کړي.
د کندهار د ژېړۍ ولسوالۍ یوه مشر عبدالباقي نورزي بیا له پخواني ولسمشر حامد کرزي څخه وغوښتل چې خلک ور وغواړي او په یوه لویه غونډه کې د شیدامحمد ابدالي ملا وتړي.
هغه دغه راز غوښته وکړه چې له لوی کندهاره دې همدا یو کاندید وي او د متعددو کاندیدانو مخنیوی دې وشي.
د جمعه ګل اسحاقزي په نوم یوه مشر بیا وویل چې د کندهار دوو مشرانو شاه ولي کرزي او جنرال عبدالرازق په ګډه پر دې موضوع کار کړی، څو شیدامحمد ابدالي د ولسمشرۍ په راتلونکو ټاکنو کې د نوماند په توګه وړاندې شي.
د ده په خبره، دغو دوو مشرانو په دې اړه تر کابل او شمال پورې له سیاسیونو او مخورو سره خبرې او مشورې هم کړې وې.
غونډې ته څو ځوانانو هم خبرې وکړې او ویل یې چې مشرانو پر شیدامحمد ابدالي توافق کړی او دوی ته هم د منلو وړ دی.
ډاکتر شيدامحمد ابدالي شاوخوا شپږ کاله په هند کې د افغانستان سفیر و او دغه راز د حامد کرزي د حکومت پر مهال د امنیت شورا مرستیال پاتې شوی او یو شمېر نورې دندې یې هم ترسره کړې دي.
نوموړی په دې وروستیو کې له خپلې دندې تر استعفا وروسته کندهار ته تللی او هلته یې له خلکو سره لیدنې کتنې پیل کړې دي.
