د پنجشیر په ایمرجنسۍ روغتون کې ۱۲ نوي زيږېدلي ماشومان په یوه وخت په ناڅاپي توګه مړه شوي دي.
د پنجشیر د عامې روغتیا ريیس شېردل دانش وايي چې تر دې مهاله د مړو شویو ماشومانو د مړینې لامل معلوم نه دی، خو په وينا يې چې په دې اړه څېړنې روانې دي.
نوموړي زیاته کړه چې مړه شوي ماشومان ټول تر خپل نورمال وخت مخکې زيږېدلي وو چې د کم وزن له امله د دغه ولایت په یوه روغتون کې تر جدي مراقبت لاندې وو: «ټول نوي زيږېدلي ماشومان د بېلابېلو روغتیايي ستونزو له امله بستر وو، دا چې د دوی د مړینې اصل لامل ميکروب، مرضونه او یا تخنیکي ستونزه ده، معلومه نه ده. څېړنې روانې دي، خو تر دې مهاله بشپړې شوې نه دي.»
نوموړي زیاته کړه چې د مړو شویو ماشومانو عمرونه له شپږو تر پنځلسو ورځو پورې وو.
دانش وویل، په دې اړه یو پلاوی ټاکل شوی، څو د یادو ماشومانو د مړینې لامل معلوم کړي.
په ورته مهال د پنجشیر د ایمرجنسۍ روغتون مسوول ډاکټر محمد اکبر وفا ويلي چې له مړو شویو ماشومانو څخه درې د کاپیسا، درې د پنجشیر او شپږ نور د پروان ولایت وو.
په افغانستان کې تر خپل نورمال وخت مخکې د ماشومانو زيږېدل یوه جدي روغتیايي موضوع ده چې په اړه یې روغتیاپالانو اندېښنې ښودلې.
روغتیاپالان تر خپل نورمال وخت مخکې د کم وزن لرونکو ماشومان زيږېدل په مېرمنو د درندو کارونو کول، د حاملګۍ پرمهال د ډاکټرانو له مشورې پرته د درملو خوړل او د کافي خوړو نشتوالی ښيي.
په دې برخه کې د معیاري روغتونونو نشتوالی هم یوه له جدي ستونزو څخه ګڼل کېږي.
