د انوارالحق احدي په مشرۍ نوې ملي جبهې له لوی ملي ائتلاف سره پرېکون کړی دی.
د راتلونکي حکومت جوړښت، په ځانګړي ډول د اجرائیه ریاست د دوام ترڅنګ د لومړي وزارت د څوکۍ رامنځته کول هغه مسایل دي چې د انوارالحق احدي په مشرۍ نوې ملي جبهه یې له لوی ملي ائتلافه د خپلو وتلو لاملونه بولي.
د نوې ملي جبهې ویاند سیدجواد حسیني پرون په کابل کې يوې خبري غونډې ته وويل: «د افغانستان د لوی ملي ائتلاف د یو شمېر مهمو غړو له لوري د حکومت په جوړښت تجدید نظر، په ځانګړې توګه د حکومت د اجرائیه ریاست پر دوام ټینګار، د صدارت د مقام تشکیل له دریو مرستیالانو سره او په مرکزیت نه ټینګار د ملي جبهې او ملي ائتلاف ترمنځ لوی فکري واټن رامنځته کړ چې په پایله کې د افغانستان نوې ملي جبهې پرېکړه وکړه چې له ملي ائتلافه ووځي.»
حسیني همدا شان د ولسمشرۍ په راتلونکو ټاکنو کې د احدي نوماندي هم تایيد کړه.
لوی ملي ائتلاف د روان لمریز کال د زمري په څلورمه په کابل کې د خپل موجودیت اعلان وکړ.
د اوسني او پخواني حکومت یو شمېر لوړپوړي چارواکي، په ځانکړي ډول د ولسمشر لومړی مرستیال عبدالرشید دوستم، د اجرائیه ریاست دويم مرستیال محمدمحقق، د بهرنیو چارو وزیر صلاح الدین رباني، د بلخ پخوانی والي عطامحمد نور، د ولسي جرګې یو شمېر غړي، احمد ضیا مسعود، د ملي امنیت پخوانی ريیس رحمت الله نبیل، زلمی رسول او یو شمېر نور هغه سیاسي څېرې دي چې د لوی ملي ائتلاف غړيتوب لري.
نوې ملي جبهې له لوی ملي ائتلاف سره په داسې حال کې پرېکون وکړ چې راتلونکو ولسمشريزو ټاکنو ته د ډلو د جوړېدو هڅې روانې دي.
د لوی ملي ائتلاف وياند فضل الرحمن اوریا له دغه ائتلافه د احدي وتل تاييدوي، خو وايي چې د وتلو لامل يې د احدي له قيد او شرطه پرته نوماندي ده.
اوريا زياته کړې: «اساسي ستونزه دا وه چې ښاغلي احدي غوښتل چې دی پرته له قید او شرطه د افغانستان د لوی ملي ائتلاف له لوري نوماند شي، خو ملي ائتلاف د ولسمشرۍ د نوماند لپاره ځانګړي شرایط لري چې احدي صیب ته دغه شرایط د منلو وړ نه وو، نو اساسي ستونزه همدا وه چې له موږه يې خپله لاره جلا کړه.»
اوریا وايي، د لوی ملي ائتلاف له لوري د راتلونکي حکومت په جوړښت، د اجرائیه ریاست په دوام او د لومړي وزارت څوکۍ په جوړېدو لا هم د دوی تخنیکي کمېټه بحثونه کوي چې تراوسه کومې نتیجې ته نه دي رسېدلي.
په همدې حال کې د ملي جنبش ګوند ویاند بشیراحمد ته ینج هغه اوازې رد کړې چې ګوندې د ولسمشر لومړي مرستیال عبدالرشید دوستم هم له لوی ملي ائتلافه خپله لاره جلا کړې ده.
