د ولسمشر د سلاکار اسدالله فلاح په مشرۍ اروزګان ته تللى پلاوى وايي چې د خاص اروزګان او مالستان ولسواليو په نښتو کې ٤٠ ملکي وګړي وژل شوي دي.
دا نښتې تېره اونۍ د اروزګان ولايت د خاص اروزګان په کندلان او حسيني کليو کې وروسته له هغه پيل شوې، چې له کُندلان کلي څخه يوه ښځه حسيني کلي ته تللې وه.
ځايي اوسېدونکي وايي، کله چې د کُندلان کلي خلک او مشران د يادې ښځې د راوستو لپاره هلته ولاړل، نو جګړه پيل شوه چې وروسته طالبان هم په کې ښکېل شول.
طالبانو په جلا جلا خبرپاڼو کې ويلي وو چې هلته يې د اربکيانو د يو قوماندان حکيم شجاعي مرستيال په ګډون يو شمېر وسله وال وژلي او شجاعي يې هم ټپي کړى دى.
کندلان او حسيني کلي د خاص اروزګان ولسوالۍ اړوندې سيمې دي چې د غزني د مالستان ولسوالۍ سره ګډه پوله لري.
ولسمشر وړمه ورځ د خپل سلاکار اسدالله فلاح په مشرۍ يو پلاوى د يادې پېښې د څېړلو په موخه اروزګان ته ولېږه، چې په کې د يو شمېر نورو سلاکارنو په ګډون د ملي دفاع او کورنيو چارو وزارتونو، ملي امنيت، لويې څارنوالۍ او چارو ادارې استازي هم شامل وو.
ياد پلاوى اروزګان ته تر رسېدو وروسته له ځايي چارواکو سره د خاص اروزګان ولسوالۍ ترڅنګ د غزني مالستان ولسوالۍ ته هم ولاړ.
د پلاوي مشر اسدالله فلاح پرون په مالستان ولسوالۍ کې خبريالانو ته ويلي چې د يادې پېښې هر اړخيزې ارزونې يې پيل کړې دي.
هغه زياته کړې، د اروزګان ولايت د ملکي او امنيتي مسوولينو ترڅنګ يې د مالستان له ولسوال او د خاص اروزګان او مالستان ولسوالۍ له اوسېدونکو او قومي مشرانو سره هم ليدلي دي.
نوموړي ويلي، چې دا جګړه قومي نه، بلکې د طالب او دولتي ځواکونو او دولت پلوه خلکو ترمنځ جګړه ده.
هغه ويلي، په دې جګړه کې تر اوسه ٤٠ ملکي وګړي وژل شوي چې په کې ښځې او ماشومان هم شامل دي، خو دا يې نه دي ويلي چې د چا له خوا وژل شوي دي.
د مالستان ولسوال امام زمان پژواک اژانس ته ويلي چې د خاص اروزګان جګړه قومي نه ده او طالبانو پر خلکو او دولتي ځواکونو بريدونه کړي وو.
هغه ويلي چې تر خاص اروزګان ولسوالۍ وروسته وسله والو طالبانو د مالستان پر شېرداغ کلي هم بريدونه پيل کړي او تر اوسه ١١ سرتېري او يو شمېر ملکي وګړي وژل شوي دي.
