د فراه په پشت کوه ولسوالۍ کې سرتېرو ته درنه مرګ ژوبله اوښتې ده.
د پشت کوه ولسوال عبدالحکیم نوري بي بي سي ته ويلي چې شل سرتېرې طالبانو نيولي او له ۲۵ – ۳۰ نور وژل شوي دي.
پېښه له ايران سره پر پوله شوې او ولسوال ويلي چې وړاندې يې له لوړپوړو چارواکو غوښتي وو، څو په دې سرحدي سيمه کې سرتېري ډېر کړي.
د ملي دفاع وزارت ویاند جاويداحمد غفور هم په پشت کوه کې د طالبانو د بريد پخلی کړی، خو افغان سرتېرو ته د اوښتې مرګ ژوبلې په اړه یې څه نه دي ويلي.
د فراه د ولایتي شورا مرستیال شاه محمود نعیمي بيا ادعا کړې چې وسله والو طالبانو له ۲۰ ډېر سرتېري وژلي او له ۲۹ ډېر یې له ځان سره وړي دي.
نوموړي دا هم ويلي چې ښایي د وسله والو طالبانو نفوذي کسانو اول د سرتېرو منځ کې جګړه پیل کړې وي او وروسته د دې ډلې وسله والو برید کړی وي. په جګړه کې د ۱۵ طالب وسله والو د وژل کېدو ادعا هم شوې ده.
بلخوا وسله والو طالبانو بيا ویلي چې له ۳۰ ډېر سرتېري یې وژلي او له ۲۰ ډېر یې له ځان سره وړي دي.
د طالبانو ویاند ذبیح الله مجاهد وايي چې په بريد کې يې د ملي پوځ وسلې هم نيولې دي.
د پشت کوه ولسوال عبدالحکیم نوري ويلي چې وسله والو طالبانو د شپې یوولس بجې پر اول سرحدي کنډک برید پیل کړ چې تر دوو بجو د دواړو لورو ترمنځ جګړه شوې ده. نوري ويلي چې د جګړې په پای کې کنډک د طالبانو لاس ته ورغلی دی.
نوموړی وايي چې بريد د څلورو يا څلورنيم سوو په شاوخوا کې طالبانو کړی چې پرمختللې وسلې ورسره وې.
فراه له ایران سره پر پوله پروت ولايت دی چې ادعا کېږي، طالبان پکې د ايران په ملاتړ پراخ فعاليتونه لري.
