پر کابل پوهنتون وحشیانه او خونړی برید په نړیواله کچه غندل شوی او د دغه برید د عاملینو د پیدا کولو او محاکمې غږ شوی دی. وروستي معلومات دا دي چې په دغه برید کې ۲۲ کسان شهیدان شوي او تر شلو ډېر ټپیان دي. شهیدان او ټپیان لویه برخه د عامه پالیسۍ محصلین دي. که څه هم د برید پړه داعش منلې ده، خو حکومتي چارواکي بیا بیا وايي چې برید طالبانو کړی او دوی یې له مسوولیت څخه ځان نه شي ژغورلی.
له دغه وحشت او جنایت سره هممهاله منظمه هڅه روانه ده چې له دې برید په استفادې سره د سولې پروسه تخریب شي او پر جګړه ټینګار وشي. له برید وروسته نامعلومو کسانو د کابل پوهنتون پر دېوالونو د سولې ضد او د روانو خبرو د قطع کولو شعارونه لیکلي وو. ورسره په ټولنیزو رسنیو او آن نورو رسنیو کې هم د سولې د خبرو د درولو او ناکامولو یو منظم کمپاین لیدل کېده. د برید د څرنګوالي او عاملینو په اړه شکونه او بې ځوابه پوښتنې یوه خوا او ورسره دا کمپاین بل خوا د یو پلان شوي کار دوه مخونه ښکاري. پر کابل پوهنتون د وحشیانو د برید یو اساسي هدف دا ګڼل کېده چې د سولې خبرې تر سیوري لاندې راولي او دا خبرې له ناکامۍ سره مخ کړي. اوس هغوی چې له دې برید وروسته د سولې ضد کمپاین کوي، یا خو په ناپامۍ د برید کوونکو له هدف سره مرسته کوي او یا هم ځینې یې په شعوري او قصدي ډول دا کار کوي او ښايي د بریدکوونکو او د سولې ضد فعالینو ترمنځ کومه پلان شوې اړیکه هم وي. له برید وروسته د برید په ځای کې د طالبانو د بیرغ موندل کېدل او پر دېوالونو د داسې شعارونو لیکل چې ښيي په برید کې طالبان ښکېل وو، تر ډېره همداسې یوه هڅه ښکاري چې د سولې خبرو ته پرې زیان واړوي. دا نښې ښايي له برید وروسته هلته جوړې شوې وي او یا هم ښايي بریدګرو په قصدي او شعوري ډول داسې نښې پرې اېښي وي. اوس پوښتنه دا ده چې که برید طالبانو کړی و او انکار یې ترې کاوه، نو بیا یې نښې ولې پرېښودلې او که یې نښې پرېښودلې، نو بیا یې له بریده انکار ولې کاوه!؟ له همدې امله دا احتمال ډېر دی چې د وحشي بریدګرو، د برید د طراحانو او د سولې ضد کمپاین کوونکو ترمنځ د کوم پټ تړاو شونتیا شته.
پر کابل پوهنتون برید وحشت، جنایت او د ټولو ارزښتونو خلاف عمل و، خو ایا د سولې د خبرو درول او د جګړې دوام د دغه ډول بریدونو مخه نیولی شي؟ دا سمه ده چې د سولې خبرې اوس سمې نه دي روانې، خو دروازه پرانیستې ده او تمه ده چې مثبت بدلون به پکې راشي، بریالۍ به شي او موږ به یو مخ له دغسې بریدونو او وحشتونو خلاص شو، خو که خبرې ودرېږي، ناکامې شي، ډېر نور داسې بریدونه به وشي او موږ به بیا بیا د خپلو وروڼو او خویندو ویر کوو او هېڅ تضمین نشته چې په جګړه به د دغه حالت مخه ونیسو. له همدې امله د سولې ضد فعالیت پر پوهنتون له وحشي بریدګرو او د هغوی له ملاتړو سره مرسته ده او د سولې غږ د وحشي بریدګرو د ارمانونو او شومو موخو شنډول دي او دا د هر رښتیني افغان دنده ده چې د سولې غږ لوړ وساتي او په دې برخه کې تر خپلې وسې هڅې وکړي.
