د افغانستان لپاره د ملګرو ملتونو مرستندویه ماموریت یا یوناما د ولسي جرګې د تېرو ټاکنو په ورځو کې د ملکي وګړو مرګ ژوبله بې ساري بللې او ویلي یې دي چې په دې ورځو کې ۵۶ تنه وژل شوي او ۳۷۹ نور ټپیان شوي دي.
يوناما په يوه راپور کې، چې پرون خپور شو، ويلي چې د تلې په ۲۸مه د ټاکنو په لومړۍ ورځ ۵۲ تنه وژل شوي او ۳۳۹ نور ټپیان شوي دي. په وژل شويو کې ۲۳ ماشومان او دوې ښځې شامل دي.
یوناما دغه راز ویلي چې د ولسي جرګې د ټاکنو له ترسره کېدو مخکې د دغه بهیر د ګډوډولو لپاره د طالبانو د ګواښونو، خبرپاڼو او هم د ټاکنو په ورځ بريدونو ډېر خلک د خپلو رایو له کارولو بې برخې کړل.
سره له دې چې شاوخوا ۹ میلیونه کسانو د ولسي جرګې په ټاکنو کې د ګډون لپاره نومليکنه کړې وه، د ټاکنو د خپلواک کمېسیون د معلوماتو له مخې شاوخوا څلور میلیونه وګړو پکې ګډون کړی دی.
یوناما د دولت ضد عناصرو، په ځانګړي ډول د طالبانو له خوا پر ملکیانو، ملکي اهدافو او ګڼ مېشتو سیمو د ټاکنو پر مهال په ترسره شويو بریدونو ژوره اندېښنه څرګنده کړې او ټینګار يې کړی چې د نړیوالو بشري حقونو د قوانینو له مخې هر څوک حق لري چې په سیاسي چارو کې برخه واخلي، رایه ورکړي او هم په خپله ځان کاندید کړي.
د کورنيو چارو وزارت بيا د يوناما راپور رد کړی او ويلي يې دي چې په ټاکنو کې ملکيانو ته اوښتې مرګ ژوبله تر هغې ډېره لږ ده چې يوناما يې يادونه کړې.
د دغه وزارت مرستیال ویاند نصرت رحیمي ازادي راډیو ته ویلي چې د تاييد شويو شمېرو له مخې د ټاکنو په دوو ورځو کې ۱۴۰ کسانو ته مرګ ژوبله اوښتې چې له ډلې يې ۲۷ تنه شهيدان او ۱۱۳ نور ټپيان شوي دي.
