د ارګ او ټاکنيزو کمېسيونونو د غړو د استازو په نوم ځیني کسان د ولسي جرګې د شتمنو نوماندانو دفترونو ته ورځي او په ټاکنو کې د بريالي اعلانولو لپاره ترې پيسې غواړي.
د ولسي جرګې ټاکنې په ۳۲ ولايتونو کې د تلې په ۲۸مه او ۲۹مه او په کندهار کې د لړم پر پنځمه وشوې. د ټاکنيز مهالوېش پر بنسټ لومړنۍ پايلې باید د لړم پر ۱۹ مه اعلان شوې وای، خو د ټاکنو کمېسيون ويلي چې د ولايتونو د ټاکنو پايلې به د ليندۍ په دويمه او د کابل د ټاکنو پايلې به بيا د همدې مياشتې په لسمه نېټه اعلان کړي.
مسير ورځپاڼې ته د رسېدلو معلوماتو پر بنسټ، يو کس د ټاکنو کمېسيون په استازيتوب د ولسي جرګې له يوه نومانده شپږ لکه امريکايي ډالره غوښتي او ورته ويلي يې دي چې په ټاکنو کې به يې بريالی اعلان کړي.
د ټاکنيزو شکايتونو پر کمېسيون هم ورته ادعا شوې او ويل کېږي چې له کابل څخه ولسي جرګې ته له نومانده یې ۱۳۰ زره ډالره غوښتي او ورته ويلي يې دي، پر هغو رایو به يې سترګې پټې کړي چې شکايتونه پرې ثبت شوي دي.
د ملي امنيت پخواني رييس امرالله صالح بيا تور پورې کړی چې د ولسمشر د دفتر د رييس سلام رحيمي او د ولسمشر د سلاکار فاضل فضلي له دفترونو نوماندانو ته ټليفونونه کېږي او ورته ويل کېږي چې «ټوله کيسه له موږ سره ده. که غواړئ چې وکيلان شئ نو په وزير اکبرخان کې زموږ دفترونو ته راشئ».
صالح وايي، يادو کسانو تر دې مهاله څو څو ځله له ځينو «متزلزلو نوماندانو سره چې فکر کوي، د ولسي جرګې د څوکۍ د خپلولو لپاره بايد هرې دروازې ته ودرېږي او هر راز ذلت ومني کتلي دي».
سلام رحيمي د دې ادعاوو په تړاو تر اوسه څه نه دي ويلي، خو د ولسمشر سلاکار، چې د صالح له لوري تورن شوی، دا ادعا رد کړې ده.
فاضل فضلي ويلي، دا خبره کاملاً بې بنسټه ده چې د ده يا سلام رحيمي له دفتره دې له چا سره د ټاکنو په تړاو اړيکه نيول شوې وې.
فضلي وايي: «امرالله صالح د يوه چريک په څېر تل بې خلتې ډز کوي. زما او رحيمي صيب له دفتره له نوماندانو سره د اړيکو نيول کېدو ادعا بې بنسټه ده. ما مخکې هم ښاغلي صالح ته کورنۍ دنده ورکړې وه خو هغه په فېسبوک او ټوېټر کې بلاک کړی يم».
په ورته مهال د چارو ځينې شنونکي شک لري چې د ټاکنو خپلواک کمېسيون د معاملې لپاره د ټاکنو د لومړنيو پايلو اعلان ځنډولی دی.
د چارو شنونکی نظيم سمون وایي، د ټاکنو خپلواک کمېسيون بايد د ټاکنو پايلې پر ټاکلې نېټه اعلان کړې وای. دی وايي، که د ټاکنو کمېسيون دا پرېکړه په پايلو کې د لا ډېر دقت لپاره هم وي، خو له خلکو او نوماندانو سره يې ګڼ شکونه رامنځته کړي چې ښايي بدې پايلې ولري.
د ټاکنو خپلواک کمېسيون د وياند مرستيال ذبيح الله سادات له مسير سره په خبرو کې وویل چې د ټاکنو خپلواک کمېسيون ادرس مشخص دی او که له ياد ادرس پرته له نورو ادرسونو له نوماندانو سره اړيکې نيول کېږي نو کمېسيون يې مسووليت نه اخلي.
سادات وويل چې په بازار کې د کمېشنکارانو د فعاليت په تړاو اندېښنې له دوی سره شريکې شوې او دوی له امنيتي او کشفي ارګانونو غوښتي چې د نيولو لپاره يې اقدام وکړي.
نوموړي د ټاکنو د ابتدايي پايلو د اعلان پر ځنډېدو راپورته شوې اندېښنې هم بېځايه وبللې او ویې ويل چې کمېسيون حقدار ته د حق د سپارلو او لا ډېر دقت لپاره د پايلو اعلان ځنډولی دی.
