افغانستان لا هم په پاکستاني او هندي اور کې سوځېږي

د افغانستان د بهرنیو چارو وزارت د پاکستان د پوځ هغه ادعاوې رد کړې چې ګواکې د افغانستان خاوره د پاکستان پر ضد کارول کېږي. د پاکستان د پوځ ویاند بابر افتخار وړمه ورځ ادعا کړې وه چې هند هغه ډلې پالي چې په پاکستان کې ترهګریز بریدونه کوي. نوموړي ویلي وو چې د دغو ډلو طراح د هندي استخباراتو یو ډګروال “راجیش” دی چې په کابل کې د هند په سفارت کې کار کوي. د افغانستان د بهرنیو چارو وزارت بیا وايي چې افغانستان د ترهګرۍ قرباني دی او چاته اجازه نه ورکوي چې خاوره یې د بل چا پر ضد وکارول شي. بهرنیو چارو وزارت د پاکستان تورونه بې بنسټه او ناسم ګڼلي دي. دا تورونه په داسې مهال را پورته کېږي چې د پاکستان لومړی وزیر د همدې اونۍ په پای کې کابل ته را روان دی او دلته به له افغان چارواکو سره پر افغان سوله او دوو اړخیزو اړیکو بحث او خبرې اترې کوي. د افغانستان په روانه جګړه کې هند او پاکستان مخامخ ښکېل دي او موږ لا هم په هندي او پاکستاني اور کې سوځېږو. که پاکستان د طالبانو ملاتړ کاوه، هند بیا د حکومت او ځینو ډلو ټپلو ملاتړ کاوه چې د افغانستان د بربادۍ برخه دي. اوس هم پاکستان له امریکا سره د افغانستان پر سر معامله کړې او د سولې په پروسه کې پوره ښکېل دی، خو هند بیا په ټول توان د سولې مخالفت کوي. هند نه یوازې دا چې خپل لاسپوڅي سیاستوال او حکومتي زور کاروي، بلکې آن د ملېشو پر جوړولو او ګڼو نورو چارو کې ښکېل دی. له بده مرغه موږ لا هم د هندي او پاکستاني ګټو لپاره یو بل ته وسله نیولې او خپل ورور د پردیو د ګټو لپاره وژنو. همدا اوس کورنیو چارو وزارت ادعا کړې چې د هلمند په جګړه کې ۱۵۲ پاکستاني جنګیالي وژل شوي. دا سمه ده چې په دې شمېره کې به مبالغه وي، خو پاکستان افغانستان ته لا هم وسلې، ځانمرګي او جنګیالي لېږي او دا څرګند حقیقت دی. همداسې هند او په هند پورې تړلي سیاستول او ډلې په ټول توان په تخریبي فعالیتونو او مرموزو وژنو کې ښکېل دي چې د سولې پروسه تخریب کړي. زموږ د ډېری سیاستوالو سیاسي قبلې لا هم اسلام آباد او ډهلی دي. ځینې یې پر پاکستاني سیرومو چلېږي او ځینې یې بیا پر هندي سیرومو ګرم دي. د حکومت په لوري کې د هند تصویر ځکه مثبت و چې له حکومت سره یې ظاهراً مرسته کوله او د طالبانو په سیمو کې د پاکستان تصویر ځکه مثبت و چې له طالبانو سره یې مرسته کوله، خو واقعیت دا دی چې نه پاکستاني چارواکو د افغانستان خیر غوښت او نه هم هندي. پاکستان د خپلو ګټو لپاره جګړه ګرمه ساتله او هند هم هڅه کوله چې په دې جګړه کې پاکستان همداسې ښکېل وي، څو کمزوری شي او پاکستان ته د نا امنۍ د لېږد زمینه برابره شي. له همدې امله دواړو هېوادونو زموږ خاوره، وینه او سرونه د خپلو شومو موخو لپاره کارول او اوس هم همدا لوبه روانه ده. اوس د دې وخت دی چې زموږ سیاستوال سترګې پرانیزي، پر خپل ځان پاکستاني او هندي سیروم بند کړي، خپله سیاسي قبله سمه کړي او د هندي او پاکستاني ګټو پر ځای د خپلو خلکو او هېواد د ګټو، عزت او سرلوړۍ په اړه فکر او کار وکړي. اوس وخت دی چې موږ خپله خاوره د پاکستاني او هندي ګټو لپاره له روانې جګړې وساتو او خپل ورور د وژلو پر ځای په غېږ کې ونیسو او خپله ستونزه حل کړو.