ایراني چارواکو د مسکو غونډې ته ویلي، دوی سوله ییز افغانستان د ځان او سیمې په ګټه بولي او له ډېر پخوا نه هڅه کوي افغانستان کې یوې پایدارې سولې ته زمینه مساعده کړي. یادې څرګندونې د لویدیځي اسیا په چارو کې د ایران د بهرنیو چارو وزارت مرستیال رسول اسلامي کړې دي او هیله یې څرګنده کړې چې د افغان سولې په اړه د مسکو غونډه به ښې پایلې ولري. اسلامي چې په مسکو غونډه کې یې د ایران په استازولي خبرې کولې زیاته کړه، دوی په افغانستان کې د تلپاتې سولې غوښتونکي دي او په خبره یې افغانستان کې امن په سیمه کې امن دی. دا په داسې حال کې ده چې ایران له وسله والو ډلو نه په ملاتړ تورن دی او ویل کېږي چې یاد هېواد په افغانستان کې وسله والو ډلو ته وسلې او مهمات ورکوي څو دلته د دوی په ګټه وسله وال مزاحمتونه جوړ کړي.
