هند وايي، د طالبانو پر وړاندې يې دريځ نه دی بدل شوی، بلکې دوی لا هم پر دې باور دي چې طالبانو کې ښه او بد نشته.
د هند د بهرنیو چارو وزارت وايي چې د مسکو په ناسته کې د هند او طالبانو ترمنځ هېڅ ډول مستقیمې خبرې نه دي شوې.
په مسکو کې د افغان سولې په تړاو د سولې فارمټ په نامه غونډه کې طالب استازي د سولې شورا له غړو سره پر یوه مېز کښېناستل.
په دې ناسته کې د هند، ایران، چین او پاکستان استازو هم ګډون درلود.
د هند د دولت مخالفو ګوندونو په دې خبرو کې د هند ګډون د طالبانو پر وړاندې د دغه هېواد دریځ د پاموړ بدلون بللی، خو د هند دولت ویلي، د دواړو اړخونو ترمنځ هېڅ ډول مستقیمې خبرې نه دي شوې.
د مسکو په ناسته کې په پاکستان او افغانستان کې د هند پخوانیو سفیرانو هم ګډون درلود او د هند د بهرنیو چارو وزارت ویلي، په دې خبرو کې د هند ګډون د نا رسمي چارواکو په حد کې پاتې شوی.
په قطر کې د طالبانو د سیاسي دفتر مشر عباس ستانکزي او پنځو نورو طالب استازو د حاجي دین محمد په مشرۍ د سولې د عالي شورا له دريو غړو سره مخامخ خبرې وکړې.
افغان دولت ویلي، په دې غونډه کې یې حضور رسمي نه و او د سولې شورا د یوه خپلواک بنسټ په توګه ګډون پکې کړی و.
د هند د بهرنیو چارو وزارت ویاند ویلي، هېواد یې له طالبانو سره خبرې نه دي کړې او یوازې د روسیې په کوربتوب یې د افغانستان په اړه ګډون کړی.
یادې سرچینې ویلي: «د افغانستان په اړه هر ډول خبرو کې د هند دریځ او ګډون د دغه هېواد د منتخب دولت په بڼه دی او د ښو او بدو طالبانو ترمنځ هېڅ توپیر نشته.»
د طالبانو له حضور پرته د مسکو په لومړۍ ناسته کې د افغان حکومت یو رسمي پلاوي هم ګډون کړی و، خو دا ځل د افغان حکومت هېڅ کوم رسمي چارواکی دې ناستې ته نه و تللی.
