د ټاکنو خپلواک کمېسيون وايي، تر راتلونکو دوو يا دریو ورځو به د ولسمشريزو ټاکنو مهالوېش اعلان کړي.
د ټاکنو د خپلواک کمېسیون ريیس عبدالبدیع صیاد پرون د یوه مطبوعاتي کنفرانس پر مهال وویل چې د یاد مهالوېش د اعلانولو لپاره کافي وخت لري او تخنيکي ډلې يې کار کوي چې ډېر ژر د ولسمشريزو ټاکنو مهالوېش وروستی کړي.
نوموړي زیاته کړه چې د کمېسيون تخنیکي ټیمونه په دې اړه له نړیوالو ډونرانو سره کار کوي او تر راتلونکو دوو یا دریو ورځو به په مفصل ډول له ټولو جزیاتو سره د ولسمشريزو ټاکنو مهالوېش اعلان کړي.
صیاد وویل چې د قانون له مخې د ولسمشريزو ټاکنو مهالوېش باید له ټاکنو ۱۲۰ ورځې مخکې اعلان شي چې د ده په خبره، دې مودې ته لا نږدې يوه نيمه مياشت وخت پاتې دی.
د ټاکنو خپلواک کمېسيون سرچينو وړاندې ويلي وو چې پرون به د ولسمشريزو ټاکنو مهالوېش اعلان کړي، خو د کمېسيون رييس وايي، هغه تخنيکي ډله چې د مهالوېش د جوړولو مسووليت ورسپارل شوی و، د رايو په بيا شمېرنه کې دومره بوخته ده چې د مهالوېش د وروستي کولو لپاره يې وخت ونه موند.
صياد وویل چې دوی په راتلونکي کال کې د ولسمشرۍ، ولایتي او ولسوالیو شوراګانو او دغه راز په غزني کې د ولسي جرګې ټاکنې په مخ کې لري چې په وينا يې بايد ټولې پر خپل وخت ترسره شي.
ټاکل شوې وه چې د ولسوالیو شوراګانو او غزني ټاکنې د ولسي جرګې له ټاکنو سره یو ځای ترسره شوې وای، خو د ولسواليو شوراګانو ټاکنې له دې کبله چې د خلکو لېوالتيا ورته کمه وه او د غزني هغه بيا له دې کبله چې خلکو يې د څرنګوالي پرسر اختلاف درلود، وځنډېدې.
د ټاکنو د خپلواک کمېسيون رييس وويل چې د ولسواليو شوراګانو د ټاکنو پر وړاندې پخواني خنډونه لا هم پر ځای دی چې په وينا يې بايد له مخې پورته شي.
د ولسواليو شوراګانو د ټاکنو پر وړاندې تر ټولو جدي ستونزه دا ده چې په ګڼو ولسواليو کې خلک په دې ټاکنو کې نوماندۍ ته زړه نه ښه کوي. حکومت وړاندې ويلي وو چې د ولسواليو شوراګانو غړو ته امتياز نه ورکوي، له همدې کبله د هېواد په مختلفو ولسواليو کې خلکو دې شوراګانو ته له نوماندۍ ډډه وکړه.
د ټاکنو د خپلواک کمېسيون رييس د غزني د ټاکنو په تړاو هم وويل چې حکومت يې د لانجې د هواري لپاره د ولسمشر د دويم مرستيال، د اجرايه رييس د لومړي مرستيال او د سيمه ييزو ارګانونو د خپلواکې ادارې د رييس په ګډون يو پلاوی ټاکلی دی.
صياد زياته کړه چې که ياد پلاوی د غزني د ټاکنو لانجه هواره کړي نو ټاکنې به يې د ولسمشرۍ له ټاکنو سره يو ځای ترسره شي.
د غزني ټاکنې د ټاکنو د څرنګوالي پر سر د دغه ولايت د اوسېدونکو د اختلاف له کبله ځنډېدلې او کمېسيون يې لا هم د ترسره کولو په تړاو په ډاډه زړه څه نه شي ويلي.
