د امریکا هوایي ځواکونه وایي چې سږ کال یې په افغانستان کې پر طالبانو او نورو وسله والو ډلو تر شپږ زرو ډېر بمونه غورځولي دي چې دا په تېرو لسو کلونو کې تر ټولو لوړ شمېر دی. پر دې اساس هره ورځ تر شلو ډېر بمونه کارول شوي دي. امریکا په افغانستان کې د هوایي بریدونو لپاره، ایف ۱۶، ای سي ۱۳۰ الوتکې او دغه راز بېلابېل توغندي کاروي. معلومه نه ده چې د بمونو ترڅنګ څومره توغندي کارول شوي دي.
دا بمونه پر چا کارول شوي او پایله یې څه ده؟
که څه امریکايي چارواکي وايي چې دا بمونه یې پر وسله والو طالبانو کارولي، خو ټول پوهېږي چې د دغو بمونو یوه وړه برخه پر وسله والو مخالفینو او یوه لویه برخه یې پر ملکي وګړو کارول شوي دي. څومره چې دا بمونه زیات شوي، په هماغه اندازه د ملکي وګړو مرګ ژوبله هم زیاته شوې ده. یوازې په تېره اونۍ کې لسګونه افغانان د امریکا د دغو بمونو په واسطه وژل شوي چې لویه برخه یې ښځې او ماشومان دي. د هلمند په ګرمسیر کې وروستی وحشت یې ښکاره بېلګه ده چې څنګه دغه امریکايي بمونه زموږ ښځې او ماشومان په نښه کوي. که څوک د دغه وحشت د قربانیانو تصویرونه وګوري، پوهېږي چې امریکايي بمونه په ریښتیني ډول د چا پر خلاف کارول شوي دي.
که دا بمونه پر وسله والو هم کارول شوي وي، پایله یې مثبته نه ده. وسله والو طالبانو نه یوازې دا چې ماتې نه ده خوړلې، بلکې پرمختګ یې کړی دی. خپله سیګار وايي چې هغوی په تېرو څو کلونو کې ۱۲ سلنه نوره خاوره هم لاندې کړې ده. اوس دغو بمونو وسله وال مات کړي نه دي، بلکې پایله یې منفي ده. که څه هم امریکايان خپله دا نظامي تګلاره بریالۍ ګڼي او وايي چې تر هغو به دوام ورکړي چې طالبان خبرو ته حاضر شي، خو ټول پوهېږي چې دا ډول بریدونه او وحشتونه د جګړې له زیاتوالي سره مرسته کوي. که خبره د سولې وي، نو هلته د سولې خبرې روانې دي او طالبان مخامخ له امریکا سره خبرې کوي، نو بیا دغو بمونو ته څه اړتیا ده!؟ له دې ښکاري چې اصلي هدف سوله نه ده، بلکې امریکا غواړي دلته جګړه وغځوي، وحشت وکړي، خپلې نوې وسلې وکاروي او د خپلو ستراتېژیکو موخو لپاره افغان وژنې ته دوام ورکړي.
د بمونو زیاتول، د جګړې ګرمول او وحشت زیاتول، یوازې د امریکا په ګټه دي او زیان یې افغانستان او افغانانو ته اوړي. اوس که دلته یو مسوول حکومت وي، یو داسې حکومت چې پر خلکو یې زړه درد وکړي، د خلکو درد او غم احساس کړي او د دغه وطن د امن لپاره کار کوي، نو پکار ده چې غبرګون وښيي. که امریکا دلته هر جنایت کوي، شپږ زره بمونه غورځوي، د بمونو مور کاروي، ممنوعه وسلې کاروي او هر جنایت کوي، دوی یې پر وړاندې غلي دي. دا چوپتیا د حالاتو له سمون سره نه، بلکې له نا امنۍ سره مرسته کوي. د ملکي وګړو پر کورونو، ښځو او ماشومان هر بم له وسله والو سره مرسته کوي. له همدې امله پکار ده چې ددغه حالت مخه ونیول شي.
