د امريکا والسټريټ ورځپاڼې د مارچ په ۱۵مه نېټه پر خپلې ويبپاڼې خبر ورکړی، چې د چين د احصائيې ملي ادارې په همدې ورځ د ۲۰۲۲م کال د لومړيو دوو مياشتو عمده اقتصادي ګرافونه خپاره کړي، چې له مخې يې د دغه هېواد د صنايعو، پانګونې او د توليداتو د خرڅلاو ګرافونه د پخوا په پرتله پورته شوي، بلکې له اټکل څخه هم زيات شوي دي. ياد خبر وايي، چې د چين اقتصاد نړۍ ته د پرمختګ ښې نښې ورکړې دي.
د روان کال په لومړيو دوو میاشتو کې د چين د اقتصاد بيا احيا د ښه کېدو په حال کې وه او د روان کال د لومړۍ ربعې د اقتصادي پرمختګ لپاره يې کلک بنسټ برابر کړی دی.
شمېرې ښيي، چې په تېرو دوو مياشتو کې د چين د سترو صنايعو د زياتوالي ارزښت د تېر کال د همدې مودې په پرتله په سلو کې اووه اعشاريه پنځه زيات شوی، چې دغه رقم د تېر کال د ډسمبر په پرتله درې اعشاريه دوه زياتوالی ښيي. دغه راز په دغو دوو مياشتو کې د ثابتو دارايو پانګونه يې د تېر کال د همدې مودې په پرتله په سلو کې دوولس اعشاريه دوه زياته شوې، چې دغه شمېر په دې برخه کې د تېر یو کال د پرمختيایي انډول په پرتله په سلو کې اووه اعشاريه درې زیاتوالی ښيي.
سربېره پردې په چين کې مصرفي ګراف هم ښه شوی دی
په چين کې د روان کال په لومړیو دوو مياشتو کې د ټولنيزو مصرفي توکو د خرڅلاو عمومي ارزښت د تېر کال د همدې مودې په پرتله په سلو کې شپږ اعشاريه اوه ښودل شوی، چې دا د تېر کال د ډسمبر په پرتله په سلو کې پنځه زيات دی.
رويټرز خبري اژانس د مارچ په پنځلسمه نېټه خبر ورکړی، چې چين د اقتصادي پرمختګ د ثابتېدو په موخه تګلارې غوره کړي او د روان کال په پيل کې يې په اقتصادي پرمختګ کې ښې نښې نښانې ليدل کيږي.
په تېرو دوو مياشتو کې د چین اقتصادي ګرافونه ښه ښکاري او ان له اټکل څخه هم وتلي دي. خبر وايي، چې د چين د اقتصادي پرمختګ ښو نښو هغه اندېښنه هم له منځه وړې، چې د روان کال په لومړۍ ربع کې به يې اقتصادي پرمختیايي انډول تر زياتې اندازې پورې ټيټ شي.
د چين په صنايعو او پانګونو کې پرمختيایي انډول نوې سويې ته پورته شوی او دا د دغه هېواد د کورنيو اړتياوو د زياتېدو ښکارندويي کوي.د چين د شمېرنې ملي ادارې وياند فو لين هوي ويلي، چې اوسني نړيوال حالت لا هم پېچلي دي او په نړيوال بازار کې د لویو توليداتو بيې هم لوړې شوې دي او د دې ترڅنګ جيوپوليټيک شخړې د نړيوال پولي بازار د بې ثباتۍ لامل ګرځېدلې دي.
نوموړي زياته کړې، چې چين که څه هم روان کال له ډېرو ستونزو سره مخ دی، خو بېلا بېلو ادارو يې د اقتصاد د ثابت پرمختګ لپاره ډېرې هڅې کړي، چې په پايله کې يې د پانګونو، مصرف او صنايعو په برخو کې څرګند مثبت بدلونونه راغلي دي. د چين حکومت د اقتصاد د ثابت پرمختګ د ساتلو لپاره ښه زمينه برابره کړې ده.
يوه شمېره ښيي، چې په چين کې توليدي اړتياوې نورې هم ښې شوي او مصرفي اړتياوې يې هم په څرګنده توګه ډېرې شوې دي او له دې څخه د چين کورنی خوځنده ځواک ښکاري، خو د چين په علاقه داريو او ښارګوټيو کې د بې کارۍ انډول لږ څه لوړ شوی او د چين پر وړاندې د استخدام د تضمين دنده لا هم درنه ده.
