یمن کې د جګړو له امله سلګونه زره ماشومان بېځایه شوي

ملګرو ملتونو اعلان كړى، چې په تېرو شپږو مياشتو كې په يمن كې د جګړې له كبله له ۵۰۰ زرو زيات ماشومان بې ځايه شوي دي. د ملګرو ملتونو د ماشومانو د ملاتړ صندوق يونيسف وايي، دا ماشومان، چې له حديده ښاره بې ځايه شوي، له يوې خطرناكې راتلونكې سره مخ دي. په همدې حال كې د ماشومانو د ملاتړ ادارې سيف دي چيلډرن ويلي، په حديده كې د جګړې پر لنډ مهالي بندښت سربېره هم زرګونه كورنۍ د جګړې د بيا پيلېدو له وېرې له دغه ښاره د تېښتې په حال كې دي. په دې جګړه كې د ايران ملاتړې حوثي ملېشې او جمهور رئيس عبدالربه منصور هادي ته وفادار ځواكونه، چې سعودي عربستان يې ملاتړ كوي، ښكېل دي.