اروپايي ټولنه وايي، د افغان ټاکنو بهیر سخت یا جدي څاري او هڅه کوي چې دا ټاکنې له تېرو هغو توپیر ولري.
په کابل کې د دې ټولنې استازي پېیردمیودان له بي بي سي سره په خبرو کې ویلي، چې د اروپايي ټولنې کارډلې د ټاکنو د روڼتيا د ډاډمنولو لپاره په افغانستان کې کار پيل کړی دی: «د اروپا د ټاکنو کارپوهان افغانستان ته راغلي دي، هغوی د اروپا سیاسي استازولۍ او د دې ټولنې غړو ته د افغان ټاکنو د بهیر په هکله خپل تخنیکي او مسلکي نظرونه برابروي.»
نوموړي زیاته کړې چې د ټاکنو د روڼتیا لپاره له سیاسي ډلو، رسنیو او مدني ټولنو سره خبرې کوي او اروپايي ټولنه د ټاکنو په ورځ او له هغه وروسته همکارۍ ته چمتو ده.
میودان د ولسي جرګې راتلونکې ټاکنې د افغانستان او نړیوالو ملګرو لپاره مهمې بللې دي: «موږ نه غواړو چې د اکټوبر له شلمې وروسته افغانستان بیا د کړکېچ لور ته لاړ شي. داسې باید ونه شي.»
د ولسي جرګې ټاکنې د تلې پر ۲۸ مه یا د اکټوبر پر شلمه کېږي.
په کابل کې د اروپايي ټولنې سفیر د ټاکنو په هکله د خلکو د شک او ګومان په یادولو سره زیاته کړې، سیاسي ګوندونه دا چانس لري چي له خپلو استازو سره د ټاکنو په ورځ دا بهیر وڅاري او هغوی ټول باید د رایې ورکونې په مرکزونو او ځایونو کې استازي ولري.
افغان حکومت په ټاکنو کې د روڼتیا لپاره ۲۱ زره بایومېټریک الې رانیولې دي چې هر مرکز ته یوه ور کول کېږي.
د افغانستان د ۲۰۱۴ ز کال په ولسمشريزو ټاکنو کې ټاکنیز جنجال د دې سبب شو، چې پر ټاکنو د خلکو باور له منځه ولاړ شي.
د اروپايي ټولنې استازي د ولسي جرګې او ولسمشرۍ راتلونکې ټاکنې د افغانانو لپاره مهمې بولي او زیاتوي چې ځواکمن سیاسي بنسټونه د افغان سولې بهیر لپاره هم مهم دي.
د میودان په خبره، وسله وال د افغانستان د روا یا مشروع بنسټونو کمزوري کول غواړي، خو رڼې او عادلانه ټاکنې نظام ته لا ډېر مشروعيت ورکوي.
