ایران: ترهګر هڅه کوي په افغانستان او منځنۍ اسیا کې ځای پر ځای شي

د ایران د بهرنیو چارو وزارت مرستیال مرتضا سرمدي ویلي وروسته له دې چې په عراق او سوریه کې داعش ډله ماته شوه، نو اوس هڅه کوي په افغانستان کې ځان ته د پښې ځای پيدا کړي. دده په خبره څو ځله یې تر دې مخکې هم د ترهګرو د ځای پر ځای کېدو په اړه خبرداری ورکړی دی. د سرمدې په وینا د افغانستان امنیت د ایران لپاره مهم دی، ځکه که افغانستان نا امنه کېږي نو ایران ته هم نا امني ننوځي نو د ترهګرۍ ضد مبارزې په برخه کې د افغان حکومت تر څنګ ولاړ دي. دغه ایراني ديپلومات ویلي چې هېواد یې هڅه کوي له افغانستان سره د سوداګرۍ او ترانیزیت په برخه کې هم همکارۍ ډېرې کړي او په دې توګه ددغه هېواد په پرمختګ کې ونډه واخلي. ایران داسې مهال دغه څرګندونې کوي چې د هېواد په جنوب کې د ترهګرو په ملاتړ تورن دی. په ځلونو د جنوبي ولایتونو چارواکو ادعا کړې چې ایران هڅه کوي په دغه ولایتونو کې نا امنۍ جوړې کړي او د وسله والو طالبانو ملاتړ کوي.