نامتو ټوکمار او کمیډن استیومارتین ځوانو ټوکمارو او کمیډنانو ته داسې نصیحت کوي: «هومره ښه و اوسئ چې هیڅوک هم تاسې له پامه ونه غورځوي.» دا جمله مې ډېره زیاته خوښېږي. ژوند له ټولو زیارکښو انسانانو سره مینه لري. کله چې په خپله کار کې ښه وی او د غوره اوسېدو په لټه کې اوسی، نو دا ناشونې ده چې تاسې به په دې برخه کې بریالي نه وی. کله موږ ناهیلي کېږو، ښې هڅې کوو، په خپلو هیلو باوري وو او په خپلو هیلو پسې ګرځو، خو هغو ته نه رسېږو، یا همداسې نه تر لاسه کېدونکې ښکاري. هره پرېکړه ډېره مهمه ده، هر ګام مو مهم دی، ژوند په خپله لار روان وي، نه دا چې زموږ په لار. صبور او ډاډه اوسئ. د هغه سنګتراش په څېر و اوسئ چې ټوله ورځ ډبرې تراشي او بالاخره یوه ساده ضربه هغه ډبره ماتوي او سپین زر پکې پیدا کوي. لېوال او مینه ناک اوسئ. زیارکښ او فداکاره خلک چې په خپل کار کې ډېر غوره وي، هغوی هیڅکله د چا له پامه نه غورځي او نه د چا هېرېږي.
