د سولې په خبرو کې له ځنډ سره دوې لویې اندېښې را پورته شوې دي: یو دا چې د دغه ځنډ په وخت کې تاوتریخوالی همغسې روان دی او لا زیاتېږي. دویم دا چې هسې نه خبرې بېرته په ټاکلي وخت پیل نه شي، ځکه چې ځینې کړۍ سر له اوسه هڅه کوي چې د خبرو د بیا پیل پر وړاندې ستونزې او خنډونه جوړ کړي. وړمه ورځ د افغان سولې لپاره د امریکا د ځانګړې استازي په وروستیو ټویټونو کې همدې دواړو موضوعاتو ته اشاره شوې ده. خلیلزاد لیکلي چې د مذاکراتو په بیا پیل کې دې هېڅ راز ځنډ نه راوستل کېږي او تاوتریخوالی باید کم شي.
په خبرو کې دا ځنډ په داسې وخت کې راځي چې په امریکا کې د ډونالډ ټرمپ د واک موده ختمېږي او بایډن ته د واک د لېږد لپاره تیاری روان دی. یوه پوښتنه او اندېښنه دا ده چې بایډن به د افغان سولې له پروسې سره څه ډول چلند کوي. که څه هم ویل شوي چې بایډن به د ټرمپ تګلاره تعقیبوي، خو تر هغه چې بایډن په رسمي ډول واک اخلي او بیا خپله تګلاره روښانوي، د جګړې ښکېل اړخونه، په ځانګړي ډول افغان چارواکي فکر کوي چې د یو څه وخت لپاره د امریکا له فشار څخه خلاص دي. زلمی خلیلزاد کابل ته را روان دی او دلته به له چارواکو سره پر سوله خبرې وکړي، خو حکومتي اړخ داسې فکر کوي چې د خلیلزاد دنده ختمېږي، نو ځکه به یې ښايي خبرې او پیغام د تېر په شان جدي ونه ګڼي.
د افغانستان حکومت په همدې ځنډ کې دا بحث را پورته کړی چې بین الافغاني خبرې باید په افغانستان کې وشي. که څه هم دا ښه غوښتنه ده، خو نه عملي ده او نه هم د دې لپاره مطرح شوې چې خبرو ته یې ګټه ورسیږي. په ارګ کې واکمن هڅه کوي چې د دغه ډول بحثونو په راپورته کولو سره هم ځان پر خلکو ګران کړي او هم د بین الافغاني خبرو د بیا پیل پر وړاندې خنډونه جوړ کړي، څو دا خبرې وځنډېږي او ژر پیل نه شي. که څه هم حکومتي چارواکو داسې څه نه دي ویلي چې دوی به بین الافغاني خبرې په دې شرط پیلوي چې په افغانستان کې وي، خو له خبرو یې همداسې اخیستنه کېدلی شي، ځکه په واضح ډول په قطر کې خبرې بې ګټې او بې پایلې ګڼي.
دا سمه ده چې په بین الافغاني خبرو کې تر اوسه لوی پرمختګ نه دی راغلی، تاوتریخوالی روان دی او د خلکو هیلې نه دي پوره شوي، خو خبرې باید دوام وکړي. همدې خبرو ته د خلکو هیلې دي، که دا خبرې لږ او ورو پرمختګ هم وکړي، بیا هم لاسته راوړنه ده او له خبرو پرته بله لاره هم نشته. دا خبرې به اوږدې، لانجمنې او سختې وي، خو بیا هم باید دوام وکړي او په هېڅ ډول باید بندې نه شي او یا داسې شرایط وړاندې نه شي چې د خبرو د بندېدو سبب شي. له همدې امله خبرې باید دوام وکړي او ورسره دواړه اړخونه تر وروستي بریده هڅه وکړي چې تاوتریخوالی راکم کړي.
