د سولې عالي شورا وايي، هیله لري چې افغانستان او د سیمې هېوادونو ته د زلمي خلیلزاد دويم سفر د سولې خبرو ته مزل لا لنډ کړي.
د سولې د عالي شورا اجرائیوي غړي او سلاکار محمد اسماعیل قاسمیار وايي، اوس نو د دې وخت دی چې له عمومياتو تېر او د سولې خبرې اترې عملاً پيل شي.
قاسمیار افغانستان او د سيمې هېوادونو ته د خليلزاد د دويم سفر په اړه وايي، دا کار سولې ته لېوالتیا ښيي او باید په نتیجه کې يي د سولې د خبرو د څرنګوالي او پیل په اړه جزیات وروستي شي.
قاسميار ازادي راډيو ته ويلي: «دا ځل چې ډاکټر صیب خلیلزاد خپل ماموریت بیا پیل کړی، زموږ تمه دا ده چې دا ځل باید عملي ګامونه واخیستل شي، له عمومي خبرو تېر شو او باید په اصلي موضوع اتکا وکړو چې هغه د سولې خبرې اترې پیلول دي.»
دی وايي، د خلیلزاد له لومړي سفر وروسته د سولې بهیر په حرکت راغلی او د هېوادونو رول تر ډېره مشخص شوی دی.
دا هیلې او غوښتنې په داسې حال کې دي چې د امریکا د بهرنیو چارو وزارت د يوې خبرپاڼې په خپرولو سره ويلي، خلیلزاد به تر راتلونکو لسو ورځو د افغان حکومت له چارواکو او د نورو اړخونو له استازو سره وګوري، څو د افغانانو په مشرۍ د سولې د خبرو پرمختګ ته لاره هواره شي.
په خبرپاڼه کې د خليلزاد له قوله ويل شوي، هیله لري چې افغان حکومت او طالبانو د باصلاحیته پلاویو د ټاکلو پر لور منظم ګامونه اخيستي وي.
زلمي خلیلزاد د تېرې میزان میاشتې په نیمايي کې هم افغانستان، پاکستان، متحده عربي اماراتو، سعودي عربستان او قطر ته سفرونه کړي وو.
خلیلزاد د هغه سفر په جریان کې په قطر کې له طالب استازو سره هم ولیدل، خو تر ډېره يي جزیات له رسنیو سره شریک نه شول.
ټاکل شوي چې ښاغلی خلیلزاد د تېر په څېر دا ځل هم له کابل وروسته، اسلام اباد، دوحې او متحده عربي اماراتو ته سفرونه وکړي.
