د اجرائیه ریاست د دويم مرستیال محمد محقق له خوا یو ځل بیا حکومت ضد څرګندونو د ملي شورا د ځينو غړو او حقوقپوهانو سخت غبرګونونه راپارولي دي.
د مشرانو جرګې د حقوقي څار او د تقنیني چارو کمېسیون وايي، حکومتي چارواکي باید د قانوني احکامو له په نظر کې نیولو پرته څرګندونې ونه کړي.
د یاد کمېسیون مشر غلام محيالدین منصف وايي، د حکومت له دننه حکومت ضد څرګندونې ذهنونه مغشوشوي او ډېرې منفي اغېزې لري.
منصف ازادي راډيو ته ويلي: «هغه کسان چې په حکومت کې کار کوي، هغه که په لوړو او که په ټيټو څوکیو دي، باید د حکومتي پایو د ټينګولو هڅه وکړي، خو داسې څرګندونې لکه استاد محقق يې چې کوي، د هېوادوالو په ذهنونو منفي اغېز کوي او که ترې ډډه وشي، ډېر ښه کار به وي».
دا غبرګونونه داسې مهال راڅرګندېږي چې د اجرائیه ریاست دويم مرستیال وړمه ورځ یو ځل بیا تور پورې کړ چې حکومت په افغانستان کې د جګړې د تېزېدو په هڅه کې دی.
محمد محقق ویلي، د مهمو کارونو پر ځای د حکومت مشران دا وخت د ولسمشرۍ د راتلونکو ټاکنو له نوماندانو سره په بلخ، کندوز او مرکزي سیمو کې په زور ازمایلو لګیا دي.
ويل کېږي چې محقق د وردګو د سیداباد په ولسوالۍ کې د طالبانو د وروستي بريد له کبله هم د حکومت پر سیاستونو سخت انتقاد کړی دی.
محقق له دې وړاندې هم تر ډېره د حکومت په سیاست او شخصاً پر ولسمشر غني سخت انتقادونه کړي.
نوموړی نه یوازې د اجرائیه ریاست دويم مرستیال دی، بلکې د لوی ملي ائتلاف مطرح غړی هم دی.
ده تېر کال په ایران کې په یوه غونډه کې هم د حکومتي پالېسۍ ضد داسې څرګندونې کړې وې چې وروسته بیا ولسمشرۍ ماڼۍ د ده د څرګندونو د پلټنو امر وکړ، خو معلومه نه شوه چې یاده مسئله کوم ځای ته ورسېده.
د محمد محقق له خوا په بیا بيا د حکومت ضد څرګندونو سره د افغانستان د ملي مشارکت ګوند مشر نجیب الله کابلي ادعا کړې چې محقق په دا ډول پاروونکو څرګندونو غواړي چې د ایران د ګټو په خاطر په افغانستان کې کورنۍ جګړې ته لمن ووهي.
د حقوقپوهانو د ټولنې مرستیال سبحان مصباح وايي، د حکومت پر خلاف د خلکو راپارول جرمي عمل دی چې بايد تر عدلي تعقيب لاندې ونيول شي: «د جزا په کوډ کې هغه څوک چې د حکومت په ضد خلک راپاروي، مجرم ګڼل کېږي او جزا هم لري، دا څرګندونې جرمي بڼه هم لري، انتقادونه که کېږي، هغه هم خپلې قانوني لارې لري او دا د مدني ټولنو او خلکو حق دی چې حکومت متوجه کړي».
مصباح وايي، د نړۍ په سیاسي، اخلاقي او منطقي قاموس کې هم داسې څه نه شته چې یو لوړپوړی حکومتي چارواکی دې بیا بیا حکومت وګواښي او پرې دې انتقادونه وکړي.
