د ټاکنو خپلواک کمېسیون د ډېټابېس سيستم مرکز پرانیست او دغه مرکز ته یې د بایومېټریک اطلاعاتو د انتقال پروسه پیل کړه. له بلې خوا مشرانو جرګې د کمېسيون د هغې طرحې ملاتړ کړی چې پر بنسټ يې د ولايتي شوراګانو ټاکنې له ولسمشريزو ټاکنو جلا کېږي.
د ټاکنو خپلواک کمېسیون وایي چې سرور یا ډېټابېس ته د بایومېټریک اطلاعاتو د انتقال بهیر پرون یکشنبه د کورنيو او بهرنيو څارونکو بنسټونو په حضور کې رسماً پیل شو.
د کمېسیون د ویاند مرستیال ذبیح سادات وايي، دا کار د شفافیت د تأمین او په ځانګړي ډول د رایو له تکراره د مخنیوي په هدف شوی دی.
سادات ويلي، تر دې مهاله له ۲۳ ولایتونو د بایومېټریک سيستم مواد کابل ته را انتقال شوي دي او د لسو نورو ولایتونو مواد به راروانو ورځو کې را انتقال شي او هڅه کېږي چې د ټاکنو د لومړنیو پایلو تر اعلان پورې به دا پروسه بشپړه کړي.
دا په داسې حال کې ده چې وړمه ورځ کمېسیون د ولسي جرګې د ټاکنو د لومړنیو پایلو په اعلان کې د ځنډ خبره وکړه.
د کمېسیون چارواکي وايي چې د ۳۲ ولایتونو د ولسي جرګې د ټاکنو پایلې به د عقرب په دويمه او د کابل به بیا د همدې میاشتې په لسمه نېټه اعلان شي.
له مهالوېش سره سم د ولسي جرګې د ټاکنو لومړنۍ پایلې باید د عقرب د میاشتې په نولسمه اعلان شي، خو کمېسیون دا موده څو نورو ورځو ته هم وغځوله.
پر ټاکنو د څار بنسټونه بیا د ټاکنو کمېسیون پر کړنو نيوکه کوي او وايي، دا تګلارې نه شي کولای چې پاکې رایې له تقلبي رایو جلا کړي.
د افغانستان د رڼو ټاکنو د بنسټ یا ټیفا مشر محمد نعیم ایوب زاده وایي، د ټاکنو کمېسیون دې له خپلو همکارانو او شریکانو سره په سلا مشورو د رایو په شمېرلو کې په یو سم میکانېزم کار وکړي، ځکه چې د ټاکنو خپلواک کمېسیون یوازې د بایومېټریک سيستم له لارې نتیجې ته نه شي رسېدلی او ستونزې به پر خپل ځای موجودې وي.
په داسې حال کې چې پر ټاکنيزو کمېسيونونو نيوکو زور اخيستی، د ټاکنو خپلواک کمېسيون ويلي چې ډېر ژر به د ولسمشريزو ټاکنو مهالوېش اعلان کړي.
د ټاکنو د خپلواک کمېسيون مرستيال وياند عبدالعزيز ابراهيمي ويلي، کمېسيون سياسي ګوندونو او مدني ټولنو ته يوه طرحه سپارلې چې پر بنسټ يې د ولسواليو او ولايتي شوراګانو ټاکنې له ولسمشريزو ټاکنو جلا په يو وخت ترسره کېږي.
مشرانو جرګې د کمېسيون ددې طرحې ملاتړ کړی او ويلي يې دي چې ټولې ټاکنې پر يوه وخت نه شي ترسره کېدای.
په مشرانو جرګه کې د غزني استازي محمدرحيم حسنيار وويل، که وضعيت په همدې شکل دوام کوي نو پر يوه وخت د ټولو ټاکنو ترسره کول به کړکېچ رامنځته کړي.
د مشرانو جرګې دویم منشي محمد اصف صدیقي چې د پرونۍ ناستې مشري یې پر غاړه وه هم د ولایتي شوراګانو او ولسمشریزو ټاکنو د جلا ترسره کېدو په اړه د کمېسیون د پرېکړې هرکلی وکړ او له سیاسي ګوندونو او مدني فعالانو یې وغوښتل چې د کمېسیون له دې طرحې ملاتړ وکړي.
په ورته وخت کې یو شمېر سیاسي ګوندونو او د ټاکنو څارونکو بنسټونو ویلي چې د ولسمشرۍ او ولایتي شوراګانو د ټاکنو د جلا ترسره کېدو طرحه د قانون خلاف او د لویې جرګې جوړېدو ته د زمینې له برابرولو تېښته ده.
