د ملګرو ملتونو امنيت شورا د فبرورۍ په ۲۸مه نېټه د ايران د وضعيت په اړه بېړنۍ غونډه ترسره کړه. په ملګرو ملتونو کې د چين دايمي استازي فو څونګ په دې غونډه کې وويل، چې امریکا او اسرائيلو په ښکاره ډول پر ايران پوځي بريدونه کړي، چې له امله يې د سيمې وضعيت سخت کړکېچن شوی. چين په دې اړه ژوره اندېښنه څرګندوي.
فو څونګ ټينګار وکړ، چې چين تل دا دريځ لري چې ټول اړخونه بايد د ملګرو ملتونو د منشور اصل ته درناوی وکړي او په نړيوالو اړيکو کې د زور کارولو يا ګواښ مخالفت او غندنه کوي. هغه زياته کړه، چې د ايران او د سيمې د نورو هېوادونو حاکميت، امنيت او ځمکنۍ بشپړتيا ته بايد درناوی وشي.
فو څونګ وويل، دا پوځي بريدونه په داسې حال کې ترسره شوي چې امريکا او ايران په ډيپلوماتيکو خبرو بوخت وو، چې دا د اندېښنې وړ دی. ده زیاته کړې چې اړوند اړخونه بايد ژر تر ژره خبرې اترې بيا پيل کړي او د سياسي حل لارې د پيدا کولو لپاره دې هڅه وکړي.
