د پاکستان لومړي وزیر عمران خان ويلي، په خپل ټول توان به هڅه وکړو چې د سعودي عربستان او ایران ترمنځ د جګړې مخنیوی وکړو.
دا په داسې حال کې ده چې په دې وروستیو کې د سعودي عربستان او ایران ترمنځ اړیکې د بل هر وخت په پرتله ترینګلې شوې دي.
خو تازه د پاکستان لومړي وزیر ایران ته د خپل سفر پر مهال ویلي، هڅه کوي چې د تهران او ریاض ترمنځ خبرو اترو ته لار هواره کړي.
نوموړي د ایران له ولسمشر حسن روحاني او د دغه هېواد له ستر مذهبي مشر ایت الله علي خامنهاي سره هم جلا جلا کتلي دي.
په ورته وخت کې د پاکستان د بهرنیو چارو وزارت وړمه ورځ ناوخته وویل چې عمران خان به له ایران وروسته، سعودي عربستان ته ولاړ شي.
نوموړي د ایران له ولسمشر حسن روحاني سره یو ځای خبریالانو ته ویلي، تهران ته یې د سفر موخه دا ده چې د سعودي عربستان او ایران ترمنځ د کېدونکې جګړې مخنیوی وکړي.
نوموړي ویلي، د یوې جګړې د مخنیوي لپاره به له خپل ټول توان څخه ګټه واخلي.
هغه د ایران ولسمشر حسن روحاني ته په خطاب کې ویلي: «له تاسو سره خبرو زه وهڅولم، زه به اوس په ډېر مثبت فکر سعودي عربستان ته ځم، موږ به د منځګړي نه، بلکې د سعودي عربستان او ایران ترمنځ په خبرو کې د اسانتیا برابروونکي په توګه رول لوبوو… د دواړو هېوادونو ترمنځ د اختلافاتو هوارول یو مشکل او پېچلی کار دی، خو زما په فکر ممکن دی».
دا په داسې حال کې ده چې د سعودي عربستان او ایران ترمنځ اړیکې له پخوا ترینګلې وې، خو د سپټمبر په ۱۴مه د سعودي د تېلو پر تاسیساتو له بریدونو وروسته، د دواړو هېوادونو ترمنځ کړکېچ نور هم زیات شو.
ریاض، واشنګټن او ځینې نور لوېدیځ هېوادونه د سعودي د تېلو پر تاسیساتو په وروستيو بریدونو کې ایران ښکېل بولي، خو ایران دا تورونه رد کړي دي.
عمران خان ویلي چې د امریکا ولسمشر ډونالډ ټرمپ هم ترې غوښتي چې د تهران او ریاض ترمنځ د ډیالوګ د یوې بڼې په رامنځته کېدو کې همکاري وکړي.
دغه راز کله چې تېر کال ډونالډ ټرمپ د امریکا متحده ایالتونه له ایران سره د نړۍ د شپږو پیاوړو هېوادونو له لاسلیک کړي اټومي تړونه وایستل او پر دغه هېواد یې بېرته بندیزونه ولګول، د واشنګټن او تهران ترمنځ هم ترینګلتیا زیاته شوه.
د ایران ولسمشر حسن روحاني له عمران خان سره په ګډه خبري غونډه کې ټینګار کړی چې د امریکا متحده ایالتونه دې بېرته له ایران سره لاسلیک کړي اټومي تړون کې شامل شي او پر تهران لګولي بندیزونه دې لرې کړي.
