فدرالېست: امریکا ناکامه ده، ټرمپ دې خپل عسکر له افغانستان وباسي

د فدرالېست په نامه یوه امریکايي رسنۍ په یوه مطلب کې لیکي چې امریکا په افغانستان کې په خپلو موخو کې بریالۍ نه شوه، نو ټرمپ ته په کار ده، چې نور دې وخت نه ضایع کوي او خپل عسکر دې له افغانستان وباسي. د سرچینې په خبره د امریکا ستره موخه دا وه، چې هلته ترهګر ختم کړي، د نشه يي توکو کاروبار له منځه یوسي، په افغانستان کې یو ولسواک او پر خپلو پښو ولاړ نظام جوړ کړي، ترهګري وځپي، سیمه د ترهګرو له ګواښونو خلاصه کړي او د افغانستان په بیا رغونه کې همکاري وکړي. په مطلب کې راځي چې امریکا په یادو موخو کې بریالۍ نه شوه، نو له همدې امله ددې اړتیا ده، چې امریکايي عسکر له افغانستان ووځي. د فدرالېست په دغه مطلب کې د افغانستان جغرافیايي موقعیت ته هم اشاره شوې ده او وايي په دغه هېواد کې روانه جګړه د نظامي تګلارو پر مټ د ګټلو نه ده ځکه د سیمې هېوادونه په افغانستان کې خپلې ګټې لري نو امریکا ته په کار ده، چې د ګټلو لپاره یې نوې او واضح سیاسي لارې غوره کړي.