د کتاب د یوې برخې لپاره څومره د بحث وړ عنوان دی! ښایي همداسې وي ” خو زه فکر کوم چې دا رښتیا دي. ما له خپلو زیاترو استادانو اورېدلي چې وایي، نظریې بریا له ځان سره لري او افکار د شرکتونو محرکه قوې دي. موږ به هغه څه وو چې ټوله ورځ د هغو په اړه فکر کوو، خو زما لپاره بې عمله فکر کول له یوې خالي او بې حاصله ځمکې پرته بل څه نه دي. یا په بل عبارت، یوه نظریه که هرڅومره لویه هم وي، یوازې هغه وخت ارزښت لري چې په عمل کې ثابته شي.
زموږ نړۍ له ځینو متفکرو خلکو ډکه ده چې هېڅکله هم د هغو د فکر لویي او عظمت نه عملي کېږي. د فکر په برخه کې ډېر لوی خلک دي، خو د عمل په برخه کې بیا ډېر کمزوري دي او په هغه محدودیت کې په ډېرو رنځونو اخته کېږي. یوهان فون ګوټه نامتو آلماني شاعر ویلي: “هر هغه څه چې ته یې تر سره کولای شې، یا د تر سره کولو ارمان یې لرې، نو پیل یې کړه. مېړانه؛ نبوغ، ځواک او جادو له ځان سره لري.” هغه خلک چې نړیوال سټنډرډونه لري، هغو بیا دواړه موارده تر لاسه کړي وي. هغوی هم ډېر غوره تخنیکونه او هم ډېرې غوره ستراتېژۍ لري.
