مایکل کوګلمن: امریکا په نورو مسایلو بوخته ده افغان جګړه یې هېره کړې ده

د افغانستان جګړه په امریکا کې هېره شوې ده. د وېلسن څېړنیز مرکز مرستیال او د جنوبي اسیا د مسایلو څېړونکی مایکل کوګلمن وایي په امریکايي حافظو کې افغان جګړه تته او هېره شوې ده. دده په خبره امریکایی حکومت د افغان جګړې دومره په غم کې نه دی او نه هم امریکایان په دې باور لري چې ګواکي امریکا دې لا هم په افغانستان کې جګړه وکړي. دده په خبره یوه نظر پوښتنه ښيي چې شل سلنه امریکایان لا هم باور نه شي کولی چې د افغانستان جګړه اتلس کاله اوږده شوې ده. هغه وایي ددې تر څنګ ۵۰ سلنه لوړ عمره امریکایان بیا په دې باور دي چې امریکا په افغانستان کې ناکامه ده او باید له دې هېواد ووځي. کوګلمن وايي په دې منځ کې امریکايي حکومت په ډېرو نورو مسایلو بوخت دی نو پر افغان جګړه فکر کولو ته دومره وخت نه ورکوي. دده په خبره امریکا د سولې هڅې پيل کړې دي، خو طالبان فکر کوي چې دوی د جګړې په ډګر کې بریالي دي، نو ځکه ښایي د سولې خبرو ته حاضر نه شي. هغه وايي په هغه صورت کې طالبان د سولې خبرو ته ښایي حاضر شي چې امریکا او افغان حکومت ورته بې ساري امتیازات ومني. دده په وینا که امتیازات و هم منل شي نو ښايي د طالبانو له خولې د (هو) ځواب اورېدل کلونه وخت ونیسي.