میانمار کې د وروستۍ زلزلې د قربانیانو شمېر له ۳ زرو اوښتی

میانمار کې د وروستۍ زلزلې د قربانیانو شمېر له ۳ زرو اوښتی او سلګونه نور کسان لا هم نا درکه دي. جاپان کې د میانمار سفارت ویلي، د مړو شمېر ۳۰۰۳ تنو ته رسېدلی، ۴ زره او ۵۱۵ تنه ټپیان دي او ۳۵۱ تنه لا هم ورک دي. ورته مهال د دغه هېواد د هوا پېژندونکو خبرداری ورکړی چې له راتلونکې یکشنبې د روانې اپرېل میاشتې تر ۱۱مې به غیر موسمي بارانونه د مانډالې، ساګاینګ او پلازمېنې نایپیداو په څېر اغېزمنې شوې سیمې لا وځپي. د میانمار د سفارت په خبره، تر دې دمه د بشري مرستو ۵۳ جوپې د هوا له لارې دغه هېواد ته رسېدلي او د چین، هند او روسیې په ګډون له ۱۵ هېوادونو څه باندې ۱۹ سوه کسان د ژغورنې عملیاتو لپاره رسېدلي دي. د ریښتر په کچه ۷.۷ درجې دغه زلزله د تېرې جمعې پر ورځ رامنځته شوه.