ناصر اصولي: پاکستان د افغانستان پر وړاندې نوې لوبې پيل کړې دي

د ولسي جرګې غړي کمال ناصر اصولي نن ددغه جرګې په غونډه کې د خبرو پر مهال وویل، د پاکستان استخباراتي ادارې یا ای ایس ای د افغانستان پر وړاندې نوې استخباراتي لوبې پيل کړې دي او غواړي نړۍ ته دا وښيي چې دوی د ترهګرو ملاتړي نه دي. دده په خبره پاکستان د ترهګرو د ملاتړو هېوادونو په کتار کې راوستل شوی دی نو له همدې امله په ځینو ظاهري لوبو غواړي دغه ذهنیت بدل کړي. هغه د ملا سمیع الحق وژل کېدل او په افغانستان کې د ځينو مهمو شخصیتونو ترور هم د پاکستاني حکومت پلانونه بولي. اصولي همدا راز وویل، چې په پاکستان کې د ای ایس ای استخباراتي ادارې یوه ډله کارکوونکي د ملایانو په نامه فعالیت کوي او په افغانستان کې د جګړو او جهاد فتوا ورکوي. نوموړي ملا سمیع الحق هم د هغو کسانو له ډلې وباله چې په حقیقت کې د پاکستان د استخباراتي ادرې لوډسپیکر و او د همدې ادارې لپاره یې کار کاوه. اصولي پر طالبانو هم غږ وکړ، چې له خپل حکومت سره کېني او د سولې خبرې وکړي. دده په خبره له دې پرته به ټول د پاکستان د استخباراتي ادارې له لوري وکارول شي او د خپلو موخو له تر لاسه کولو وروسته به دوی له منځه وړي.