هندي رسنیو راپور ورکړی چې په دغه هېواد کې له تېرو څلورو ورځو راهیسې د سختو اورښتونو او سېلابونو له کبله د مړو شویو کسانو شمېر ۱۲۵ تنو ته رسېدلی دی.
اینډیا ټایمز هندي نشریې ویلي چې د دغو اورښتونو له کبله تر ټولو ډېر زیانونه د دغه هېواد په اتراپردېش ایالت کې اوښتي، چې له تېرې پنجشنبې راهیسې پکې ۸۰ تنه وژل شوي او په سلګونو کورونه ویجاړ شوي دي.
د دې نشریې په خبره، د هند په پاتنا ښار کې هم د درنو اورښتونو او سېلابونو له کبله خلکو ته ډېر ځاني او مالي زیانونه اوښتي دي.
په ورته وخت کې هندي چارواکو هم ویلي چې د دغه هېواد په بیهار ایالت کې د بارانونو له کبله له تېرو دوو ورځو راهیسې، ۲۹ کسان وژل شوي او د دغه ایالت ډېره برخه تر اوبو لاندې شوې ده. چارواکو ویلي چې په دغه ایالت کې بېړنی حالت اعلان شوی، سړکونه او ټولې لارې بندې دي او دغه راز په ډېریو ځایونو کې د برېښنا مزي هم پرې شوي دي.
د راپورونو له مخې، د دغه هېواد په ګجرات، راجستان، میدیا پردېش او اوتراکند کې درانه اورښتونه شوي چې تر دې مهاله پکې تر ۱۶ کسان وژل شوي او ډېر نور تري تم دي.
په ورته وخت کې د هند د هواپېژندنې ادارې هم د روانې میلادي میاشتې تر پایه په دغه هېواد کې د نورو بارانونو د ورېدو او سېلابونو د راوتلو له کبله، د دغه هېواد د زیانمنو سیمو اوسېدونکو ته خبرداری ورکړی دی.
د هندي چارواکو د شمېرو له مخې، روان کال په دغه هېواد کې د بارانونو او سېلابونو له کبله ۱۱۹۰ کسان مړه شوي، خو تېر کال بیا دغه شمېرې تر ۱۲۱۱ پورې رسېدې.
د چارواکو په خبره، ژغورونکو ډلو تر دې دمه په بېلابېلو ایالتونو کې دوه میلیونه کسان ژغورلي او د دغه هېواد په نهو ایالتونو کې یې خوندي کمپونو ته لېږدولي دي.
د هند د هواپېژندنې ادارې د معلوماتو پر بنسټ، له جون میاشتې تر سپټمبر پورې په دغه هېواد کې هر کال د اورښت کچه لوړېږي چې په دې وروستیو کلونو کې پکې په بې ساري ډول زیاتوالی راغلی دی. د دې ادارې مسوولینو ویلي چې له همدې کبله په دې موسم کې د طبیعي پېښو له کبله مرګ ژوبله هم لوړېږي.
