پر ډيورنډ کرښه یوې نامعلومې راډیو؛ د پاکستان پر پلوي د هند خلاف خپرونې پیل کړې

د ننګرهار شینوارو ولسوالۍ ته څېرمه یوې راډیو د پاکستاني پوځ په پلوي، د هند خلاف خپرونې پیل کړې دي. یاده راډیو چې پر ۹۰،۸ څپو خپرونې کوي، نشرات یې هر ماښام له اوو بجو پیلېږي چې څه باندې یو ساعت دوام کوي. ویل کېږي چې د دې راډیو ډېری خپرونې بیا د هند پر خلاف وي. دغه راډیو کوم ځانګړی نوم نه لري. خپرونې یې د شینوارو له ولسوالیو سربېره جلال اباد ښار ته څېرمه ساحو کې هم اورېدل کېږي. د دغې راډیو په خپرونو کې د پاکستان د پوځ خلاف تبلیغات او جګړې د یهودانو د ایجنټانو کار ګڼل کیږي او دغو خپرونو ته تر ډېره مذهبي رنګ ورکوي. د ننګرهار د شینوارو د ځینې ځايي خلکو په وینا د خپرونو چلوونکي ځینې وخت د سرحدي سیمو افغان اوسېدونکو ته د پاکستاني پېژندپاڼو د ورکړې وړاندیزونه هم کوي. د ننګرهار د والي ویاند عطا الله خوږیاڼی وايي تر اوسه لا په دې اړه پوره معلومات نه لري. په دغو سیمو کې د داعش او طالبانو راډیوګانې هم خپرونې کوي.