پوتین او ټرمپ د اوکراین او منځني ختیځ پر وضعیت خبرې کړې دي

د روسیې ولسمشر ولادیمیر پوتین د امریکا له ولسمشر ډونالډ ټرمپ سره د ټیلیفوني خبرو پر مهال ټینګار کړی چې هېواد به یې په اوکراین کې خپلې ټاکلې موخې تعقیب کړي او له دې دریځه به نه شاته کېږي. د روسي رسنیو د راپورونو له مخې، دواړو لورو د اوکراین جګړې او د منځني ختیځ د روان وضعیت په اړه بحث کړی دی. ویل شوي، ټرمپ یو ځل بیا پر اوربند ټینګار کړی، خو پوتین ویلي چې روسیه د کړکېچ سیاسي حل ته ژمنه ده، خو د شته وضعیت د اساسي لاملونو پر ضد به خپل دریځ نه پرېږدي. دغه خبرې داسې مهال ترسره شوې چې روسیې په تازه هوایي بریدونو کې د اوکراین پر زیربناوو بریدونه کړي، چې له امله یې ملکي وګړو ته هم مرګ‌ژوبله اوښتې ده.