د شمالي کارولینا پوهنتون د یوې څېړنې له مخې، هر عادي انسان د ورځې په اوسط ډول ۳۰۰ کالوري له بورې څخه لاس ته راوړي. ۲۰ سلنه امریکان د ورځې ۷۰۰ کالوري انرژي له هغو خوړو او خوږو څخه راوړي، چې بوره ورګډه شوې وي. له خالصې بورې نیولې بیا تر کیک او کلچې پورې او ان تر مستو پورې خلک بوره استعمالوي او خوري يې. خو ډاکتران وايي چې که بوره ونه خورئ او یا د بورې خوراک راکم کړئ، نو ډېرې ګټې به وکړئ. که بوره ونه خورئ؛ نو زړه مو قوي کیږي، خوب به مو ښه وي، حافظه به مو پیاوړې وي او له وزن بایللو سره مرسته کوي. د بورې نه خوړلو بله مهمه ګټه دا ده، چې وزن ورسره کمېږي. یانې هغه څوک چې بوره نه خوري، د وزن زیاتیدو مخه به يې نیولې وي. که یو څوک د ورځې ۲۰۰ کالوري بوره کمه کړي، په ۵ یا ۶ میاشتو کې به يې ۱۰ پونډه وزن کم کړی وي.
