هند کې تر برید وروسته؛ پاکستان ته د محمد بن سلمان سفر ځنډېدلی دی

ټاکل شوې وه چې عرب شاهزاده محمد بن سلمان نن ورځ پاکستان ته سفر کړی وای خو دا سفر په هند کې تر برید وروسته یوه ورځ ځنډېدلی دی. د هغه د سفر د ځنډ لامل نه دی په ډاګه شوی. د پاکستان د بهرنيو چارو وزارت بیا ویلي د سعودي عرب د وليعهد د سفر په پروګرام کې بدلون نه دی راغلی او هغه به د يکشنبې په ورځ (سبا) پاکستان ته ورسېږي. دا په داسې حال کې ده چې تر دې وړاندې ویل شوي وو چې نوموړی به د شنبې په ورځ (نن) پاکستان ته ورسېږي خو په هند کې د پنجشنبې ورځې تر برید وروسته چې له امله یې تر څلوېښتو پورې هندي پوځیان ووژل شول وځنډېد. یاد برید د هند او نړیوالو توند غبرګونونه راپارولي دي. که څه هم پاکستان په یاد برید کې لاس لرل رد کړي دي خو نریندرا مودي پرون وویل چې هند به د دې برید غچ خامخا اخلي. هغه پر پاکستان غږ وکړ چې ژر تر ژره دې د ترهګرو له ملاتړه لاس پر سر شي.