سعودي عربستان په اسلاماباد کې په یوه مهمه سرمشریزه کې د هند او پاکستان ترمنځ د روان کړکېچ په حل کې د منځګړیتوب ژمنه کړې ده.
د دغه هېواد د بهرنیو چارو وزیر عادلالجبیر تېره ورځ په اسلاماباد کې یوې خبري غونډه ته ویلي، چې دواړه هېوادونه د خپلو اختلافونو د حل لپاره خبرو اترو ته اړتیا لري.
نوموړي ویلي، سعودي عربستان غواړي چې د هند او پاکستان ترمنځ په روان کړکېچ کې کموالی راشي او د دې لانجې د حل لپاره باید سوله ییزې لارې ولټول شي.
د سعودي عربستان د بهرنیو چارو وزیر چې له سعودي ولیعهد محمد بن سلمان سره د اسلاماباد په سفر کې یوځای دی، تېره ورځ د شهزاده د سفر په دوام هند ته لاړ.
د سعودي ولیعهد به نن په نوي ډیلي کې له صدراعظم نرېندرا مودي سره وګوري او وروسته به چین ته هم ولاړ شي.
دا په داسې حال کې ده چې د هند تر ولکې لاندې کشمیر کې د تېرې اونۍ د پنجشنبې د ورځې له برید وروسته، چې په نتیجه کې یې د هند د ملېشه پولیسو له ۴۰ زیات سرتېري ووژل شول، د نوي ډيلي او اسلاماباد په اړیکو کې کړکېچ زیات شو.
له دې پېښې وروسته چې په څو لسیزو کې تر ټولو خونړۍ برید بلل شوې، هند د نړۍ په کچه د ډيپلوماټیک ملاتړ د ترلاسه کولو هڅې پیل کړې دي او ژمنه یې کړې چې پاکستان به په نړیواله ټولنه کې په ډیپلوماټیک ډګر کې منزوي کړي.
نوې ډیلي ويلي، داسې شواهد لري چې په دې حمله کې د پاکستان لاس لرل ثابتوي.
د هند تر ولکې لاندې کشمير کې د دې خونړۍ حملې مسوولیت جیش محمد ډلې منلی دی، چې مرکزونه یې په پاکستان کې دي.
د پاکستان حکومت په دې حمله کې د لاس لرلو تورونه رد کړي دي او وايي چې د هند حکومت په دې اړه له څېړنو مخکې باید پر پاکستان تورونه ونهلګوي.
د پاکستان د بهرنیو چارو وزارت تېره ورځ ویلي چې په هند کې د پاکستان سفیر یې د سلا مشورو لپاره خپل هېواد ته ورغوښتی دی.
