د چین سږنی پسرلنی اختر په نړۍ کې د” نامادي کلتوري ميراث ” لومړنی پسرلنی اختر و، چې په درشل کې يې لګښتونه او هم د چینایانو لېوالتيا ډېره وه. په چین کې د سږني اختر په درشل کې ۵۰۱ میلیونو خلکو سفرونه کړي او د سفرونو لګښت يې له ۶۷۷ ميلیارډو یوانو څخه پورته ښودل شوی، چې دا د تېر کال د پسرلني اختر د ورته شمېرو په پرتله په جلا جلا توګه ۵،۹ سلنه او ۷ سلنه زیاتوالی ښيي. بر سېره پر دې، د روان کال د پسرلني اختر په اونيزې رخصتۍ کې د چيني فلمونو د پلورل شویو ټکټونو ارزښت هم نوی نړيوال ريکارډ جوړ کړی دی.
روان کال د چين د کرنيزې جنترۍ له مخې د مار کال دی او د سږني پسرلني اختر بازار د چین د اقتصاد لپاره ښه پیل بلل شوی دی.
د پسرلني اختر په جریان کې د چین کلتوري او سیلانيز بازار ډېره وده کړې او د “ نامادي کلتوري میراث” محتویات د انټرنېټ په لټونځي کې توده موضوع ګرځېدلې ده. شمېرې ښیي، د سږني اختر په درشل کې د انټرنېټ په لټونځي کې د “پسرلني اختر سفر” د لټون اندازه د تېر کال د همدې مودې د ورته اندازې په پرتله ۳۲۸ سلنه زیاتوالی ښيي. نړيوال شنونکي وايي، د پسرلني اختر اقتصاد به د دودیز نوي مار کال په بهیر کې د نوښت خوځنده ځواک برابر کړي او د چيني بازار کورنی ځواک او قوي انعطاف به ښکاره کړي.
مالومات ښيي، د نړۍ یو پر پنځمې برخې خلکو سږنی پسرلنی اختر په مختلفو بڼو لمانځلی دی. بهرنيانو د چين په شياوهونګشو يا ریډ نوټ (Red note) ټولنيزې رسنۍ کې د چون ليان (ځانګړي اوږده کاغذونه چې هنري نثرونه او شعري بیتونه پرې ليکل کيږي او د دروازو پر غاړو نصبېږي) د ليکلو او د جاوځه يا ډامپلين (يو ډول خواړه دي) جوړولو زده کړه کړې او هم ډېرو يې د چین ميډيا ګروپ د پسرلني اختر ماښامنۍ هنري ننداره کتلې ده.
چین په دې وروستیو کلونو کې نړۍ ته خپلې دروازې پرانیستلي او په دوامدار ډول یې تعرفې ټيټې کړې دي. د نيوزيلنډ کيوي او د چيلي د الوبالو په شمول د نړۍ ډول ډول ميوو او خواړو د چین بازار ته لاره موندلې او ډېر مشهور شوي دي. د چين د سوداګرۍ وزارت مالومات ښيي، چې د سږني پسرلني اختر په موده کې د ايټالیې د چاکلیټونو او خواږو او د امريکا د وينې ګلوکوز ميټر(Glucose meter) د انلاين خرڅلاو اندازې د تېر کال د همدې مودې په پرتله په جلا جلا توګه ۸۲،۱ سلنه او ۶۹،۱ سلنه زياتې شوې دي.
چين په دې وروستيو کې د بهرنيانو لپاره د تګ راتګ اسانتياوې هم برابرې کړي او د سږ کال د پسرلني اختر په درشل کې ډېرو بهرنيانو چين ته سفرونه کړي دي. د هغو بهرنيانو شمېر، چې د سږني پسرلني اختر په درشل کې يې چين ته سفرونه کړي، د تېر ۲۰۲۴م کال د ورته شمېر په پرتله په سلو کې ۱۵۰ زیاتوالی ښيي او نوی ریکارډ یې جوړ کړی دی.
نړۍ د پسرلني اختر د کړکۍ له لارې پرانيستی او ټولشموله چين ليدلی او د دغه هېواد د اقتصاد خوځنده ځواک احساس کولی شي.
د چين اقتصاد په داسې حال کې، چې نړيوال اقتصاد له ګڼو ننګونو سره مخ دی، پرمختګ کوي او په نوي کال کې یې د اقتصاد د اوږدمهاله پرمختګ د ملاتړ شرايط او بنسټيز تمايلونه نه دي بدل شوي.
د چین د هراړخیزو اصلاحاتو او د لوړې کچې ورخلاصون بهیر به د دغه هېواد اقتصاد نور هم په خوځښت راوالي او پرمختګ به وکړي.
