د چین دولت رئیس شي جين پينګ د مارچ په ۵مې نېټې د څوارلسم ملي ولسي کانګرېس د درېیمې کلنۍ غونډې په درشل کې د جیانګسو ولایت د پلاوي په بحث کې د ګډون پرمهال ویلي، چې لوی اقتصادي ولايتونه باید د څوارلسم پنځه کلن پلان موخو ته په رسېدنه کې مهم رول ولوبوي.
«تیاو دا لیانګ»
رئیس شي جين پينګ د ۲۰۲۳م کال په جنورۍ کې په څوارلسم ملي ولسي کانګرېس کې د جیانګسو د استازي په توګه ټاکل شوی دی. نوموړي په تېرو دوو کلونو کې د جیانګسو ولایت د پلاوي په بحثونو کې څو ځلې ”تیاو دا لیانګ“ اصطلاح کارولی.
”تیاو دا لیانګ“ پخوا په چیني ژبه کې د ساختماني ودانيو د هغه مرکزي تير يا بیم لپاره کارول کېده، چې د ودانۍ د جوړښت د ساتنې او د وزن د تحمل مسؤل به و. خو په اوسني ټولنيز ژوند کې دغه اصطلاح د اصلي يا مرکزي دندې د تشبې لپاره راوړل کېږي.
شي جين پينګ تېر کال د جیانګسو ولایت پلاوي ته ويلي: ” ما د چین د کمونېست ګوند د مرکزي کمېټې د سیاسي بیورو په غونډو کې څو ځلې د ګوانګدونګ او جیانګسو په شمول لوی اقتصادي ولایتونه يادولي چې داسې ولايتونه باید د هېواد په اقتصادي پرمختګ کې تیاو دا لیانګ رول ولوبوي. که داسې نه وي، نو د هېواد د عصريتوب به تر سره نشي. تاسې خورا مهم ځای نيسي چې پر ځای يې نشي کولای. “
تېر کال د جیانګسو ولایت د تولید ارزښت 13.7 ټریلیونو يوانو ته رسېدلی او په هېواد کې يې دوهم ځای خپل کړی دی. دغه شمېر یې د ۲۰۲۳م کال په نسبت 5.8 سلنه زیاتوالی ښيي او د زیاتوالي سرعت یې بیا په هېواد کې لومړی ځای نیولی دی. جیانګسو يو لوی اقتصادي ولایت دی او د هېواد د اقتصادي پرمختګ لپاره مهم رول لوبولی شي.
شي جين پينګ د لویو ولایتونو د پرمختګ لپاره څلور وړاندیزونه کړي دي:
۱. لوی اقتصادي ولایتونه باید د ټکنالوژۍ او صنعت نوښتي چارې د یو ځای کېدو په برخه کې مخکښ رول ولوبوي. دغه ولايتونه د مهمو دندو په ترسره کولو کې د نوي کیفیت تولیدي قوت پراختیا ته اړتیا لري. د ټکنالوژۍ او صنعت نوښتونه د نوي تولیدي قوت د پراختیا لپاره اساسي لارې برابروي.
نوموړي د صنعتي نوښت په برخه کې، د حقیقي اقتصاد د بنسټونو پر خونديتوب او د تقليدي صنعتونو د بیا جوړولو او ستراتیژیکو نويو صنعتونو او راتلونکو صنعتونو د نويو لارو پر جوړولو ټينګار کړی دی.
۲. لوی ولایتونه باید د ژورو اصلاحاتو او د لوړې کچې ورخلاصون په برخه کې مخکښ واوسي او باید په دې برخه کې ډېرې هڅې وکړي.
چین لوی اقتصاد لري، نو د پرمختګ لپاره خوځنده قوت ته ډېره اړتيا لري.
شي جين پينګ ويلي، جیانګسو ولایت دې لومړی ازمويښتي تدبیرونه ونیسي، د ژورو اصلاحاتو او ورخلاصون له لارې د خنډونو د لیرې کولو او د محرکه قوه د هڅونې لپاره دې ګامونه پورته کړي.
تېر کال د جیانګسو ولايت په اقتصاد کې د خصوصي سکټور وڼده نږدې 60٪ وه.
نوموړي د جيانګسو ولایت د استازو په ډله کې، د ټولو مالکیتونو شرکتونو سره یو شان چلند او د سوداګريز چاپېریال دوامدار ښه والی اړین بللي دي.
۳. لوی ولایتونه باید د هېواد د سترې ستراتېژۍ د عملي کولو لپاره لارښوونکي رول ولوبوي.
جیانګسو ولایت د یانګځه سیند په مثلث کې موقیعت لري، نو د دې سیمې د یو ځای کېدو جریان او د یانګځه سیند د اقتصادي کمربند د پرمختګ ستراتيژۍ کې باید ابتکاري اغېزمن تدبیرونه ونیسي.
۴. لوی ولایتونه باید د هېواد د ټولو وګړيو د ګډ پرمختګ او سمسورتیا لپاره نمونوي رول ولوبوي.
رئیس شي جين پينګ د جیانګسو ولایت د پلاوي په بحث کې درې ځلې دغه ټکي ته اشاره کړې، چې دغه ولايت باید د اقتصادي پرمختګ په برخه کې مهم رول ولوبوي او دا یې نه یوازې له جیانګسو ، بلکې د چين له ټولو ولايتونو يې هم ورته غوښتنه کړې ده.
