د هند او پاکستان کړکېچ؛ د پښتونخوا روغتونونو کې تیاریانې نیول شوې دي

د خیبر پښتونخوا روغتیایي چارواکي وایي، ټولو روغتونونو ته یې لارښوونه کړې ده چې خپلې تیاریانې دې ونیسي. د چارواکو په خبره ژوندي قومونه ځانونه د حالاتو لپاره تیار ساتي نو دوی هم دولتي او خصوصي روغتونونو ته امر کړی دی چې خپل امکانات پوره او لا زیات کړي. روغتیایي چارواکي وایي دوی خپله روغتونونو ته یاده لارښوونه کړې ده او د حکومت لخوا ورته په دې اړه د تیاري خبر نه دی ورکړل شوی. خیبر پښتونخوا کې دا تیاریانې وروسته تر هغه نیول کېږي چې د هندي کشمیر په پلوامه کې پر هندي سرتېرو تر برید وروسته د دواړو هېوادونو ترمنځ اړیکې خورا ترینګلې شوې دي او د هند لومړي وزیر او نورو چارواکو پاکستان ته د غچ اخیستلو خبرداری ورکړی دی.