د چين د دولت رئيس شي جين پينګ د مې د نهمې نېټې په شپه په مسکو کې د شوروي اتحاد لخوا د وطن د دفاع جګړې د برياليتوب ۸۰مې کليزې د يادونې په پار جوړ شوي رسم ګذشت کې د ګډون په ترڅ کې د سلواک له صدراعظم روبېرټ فيکو سره وکتل.
شي جين پينګ دې ته اشاره وکړه چې د چين او سلواک د اړيکو هر اړخيز، ژور او لوړ کیفیت پرمختګ د دواړو هېوادونو د خلکو له اساسي ګټو سره او د ورخلاصون او ګډ پرمختګ له تاريخي رجحان سره سمون لري. هغه مهمې ګډې نظريې چې موږ د تېر نومبر کې چین ته ستاسو د سفر په جریان کې ترلاسه کړې وه، اوس په فعاله توګه پلې کېږي. د چین او سلواک ستراتیژیکې همکاریزې اړیکې په چټکۍ سره پیاوړې شوې دي. دواړه خواوې باید دودیزې دوستۍ ژورې کړي، د لوړې کچې تبادلې پیاوړې کړي، یو له بل څخه په کلکه ملاتړ وکړي، په ګډه د کمربند او لارې نوښت اباد کړي، او د چین – سلواک او چین – اروپا اړیکو دوامداره او اوږدمهاله پرمختګ ته وده ورکړي.
فیکو وویل چې د سلواک او چین د ستراتیژیکو همکاریو اړیکې د سلواک د بهرني سیاست لوړ لومړیتوب دی. سلواک به په کلکه د یو چین پېژندنې اصل مراعات کړي، د چین د لویو وړاندیزونو ملاتړ به وکړي لکه د انسانانو د ګډ برخلیک ټولنې ابادول. سلواک د اوکراین او منځني ختیځ په څېر مسئلو کې د چین د دریځ او رغنده رول ستاینه کوي او غواړي چې له چین سره د څو اړخیزم د ساتلو، د آزادې سوداګرۍ د اصولو د ساتنې او د نړۍ د صنعتي او عرضي زنځیر د ثبات لپاره کار وکړي.
