د چين او امريکا د اقتصادي او سوداګريز مشورت ميکانيزم لومړنۍ غونډه پر ځايي وخت د جون له ۹مې نېټې څخه تر ۱۰مې نېټې پورې د بريتانيا په لندن کې تر سره شوې. دواړو خواوو صادقانه او ژورې خبرې اترې کړي او اصولا د دواړو هېوادونو د مشرانو د جون د ۵مې نېټې په ټيلېفوني خبرو او د جنيوا په خبرو کې د شویو توافقاتو د پلي کېدو لپاره يې د اقداماتو چوکاټ جوړ کړی دی.
د چين او امريکا په سوداګريزو چارو کې د چيني پلاوي مشر او د صدراعظم مراستيال هه لي فنګ ويلي، چې له امريکا سره د سوداګريزو چارو په اړه د بېجينګ رويه او دريځ څرګند او تل دی. دواړه خواوې بايد د مساوي خبرو او د ګډو ګټو پر بنسټ د همکاريو له لارې خپلمنځي اختلافونه حل کړي. ده ويلي، چې چين د تجارتي مذاکراتو په اړه صميميت او هم خپل اصول لري.
هه لي فنګ دغه راز ويلي، چې دواړه خواوې بايد د دواړو هېوادونو د ولسمشرانو په ټيلېفوني خبرو کې د مهمو ګډو توافقاتو او غوښتنو له مخې د اقتصادي او سوداګريز مشورت له ميکانيزم څخه ښه استفاده وکړي او خپلمنځي توافقات لا زيات، سوتفاهم کم او همکارۍ پياوړې کړي.
امريکايي لوري دغه غونډه اغېزمنه او د دوه اړخيزو سوداګريزو اړيکو د ثبات لپاره ګټوره بللې او ويلې يې دي، چې د دې غونډې د ګډو توافقاتو د عملي کولو لپاره له چين سره ګډې هڅې وکړي.
