د چین د سوداګرۍ وزارت ویاند د جولای په ۲۹مې نېټې رسنیو ته ویلي، چې د امریکا فدرالي مخابراتو کمېسیون له یو څه مودې راهیسې د چین له مخالفت سره سره محدودیتي اقدامات زیات کړي او د چین مشروع سوداګریزو ګټو ته يې سخت زیانونه رسولي دي.
د چین د سوداګرۍ وزارت ویاند ويلي، د واشنګټن دغو کړنو د چین او امریکا د اقتصادي او سوداګریزو اړیکو ثبات کمزوری کړی او نړیوال صنعتي او اکمالاتي ځنځیرونه يې خراب کړي دي. بېجینګ د واشنګټن د دغو کړنو سخته غندنه او ورسره ټينګ مخالفت کوي.
د امریکا فدرالي مخابراتو کمېسیون د جولای په ۲۸مې نېټې د بهرنيو هېوادونو له لوري توليدېدونکي برقي انورټرونه او پرمختللي روبوټیک تجهیزات د محدوديتونو په لېست کې شامل کړي، چې له امله يې د دغو محصولاتو ځیني نوي ماډلونه د ياد کمېسيون له لوري نه تصدیق کېږي او د امریکا بازار ته نه شي وړاندی کېدای.
نوموړي ویاند له امریکا غوښتي، چې سمدلاسه یاد اقدامات لغوه او خپلې تېروتنې ودروي او که چېرې خپلو ورته کړنو ته دوام ورکړي، نو چین به هم د خپلو مشروع حقونو او ګټو د ساتنې لپاره ورته ځوابي اقدام غوره کړي.
