پاکستان؛ لاهور کې د کور چت پرېوتو پېښه کې اته کسان مړه شوي

پاکستاني رسنیو د راپورونو له مخې د پنجاب ایالت د لاهور ښار د هربنس‌پوره په سیمه کې د یوه کور د چت پرېوتو له امله لږترلږه اته کسان مړه شوي دي. د لاهور مرستیال کمېشنر محمدعلي اعجاز ویلي، ژغورونکې ډلې لا هم د کنډوالو په پاکولو او د احتمالي بند پاتې کسانو په ژغورلو بوختې دي. نوموړي د پېښې د لامل د معلومولو لپاره د پلټنو امر هم کړی دی. دا په داسې حال کې ده، چې شاوخوا یوه میاشت مخکې هم د لاهور د کاهنه په سیمه کې د یوه خصوصي ښوونیز مرکز د چت د پرېوتو له امله ۱۴ ماشومان مړه شوي وو، او د روان کال په مې میاشت کې د ډېره غازي خان په یوه خصوصي ښوونځي کې ورته پېښه کې څلور ماشومان وژل شوي او ۲۰ نور ټپیان شوي وو.