په پښتانه کتاب کې په ښه توګه د پاکستان په قبایلي سیمو کې د ترهګرۍ ودې ته کتنه شوې ده. په دغه کتاب کې د ډیورنډ کرښې دواړو غاړو ته د پرتو پښتنو پر تاریخ او وضعیت د موثقو شواهدو په راوړلو سره رڼا اچول شوې ده. لیکوال پر هغو دلایلو څېړنه کړې ده، چې د یادې سیمې د پنځو شپږو پیړیو منزوي شوي سوله خوښ خلک یې په ناخوالو کې راګیر کړي دي. د دې څېړنې ارزښت دا دی چې د لومړي لاس معلومات او مواد په کې وړاندې شوي دي.
د دغه کتاب لومړۍ برخه دری ابتدايي څپرکي لري. لومړی څپرکی د پښتنو په اړه یوه سروې ده، چې د غرونو تر ښارګوټو او ښارونو پورې د هغوی پر ژوند بحث کوي.له دې سیمو ځینې یې له هغو سیمو سره ورته والی لري، چې د ۲۰۰۱ ز کال د سپټمبر له پېښې سره نیغې اړیکې لري. دویم څپرکی د پښتنو د تېرو پنځو پیړیو تاریخ بیانوي. په دې برخه کې له امپراتوریو او دولتونو سره د پښتنو پر پېچلو اړیکو او دا چې ځینې اړیکې دوی په خپله پرمخ وړې، بحث شوی دی. درېیم څپرکی د وروستي تاریخ په اړه دی، چې طالبان څنګه راپورته شول او څنګه بېرته په افغانستان کې له پښو ولوېدل.
د کتاب دویمه برخه پاکستان ته ځانګړې شوې. څلورم څپرکی د وزیرستان جګړه بیانوي. په دغه څپرکي کې د پاکستاني طالبانو پر راپورته کېدنه، د هغوی پر ايډیالوژۍ، له القاعدې، افغان طالبانو او مرکزي اسیا له افراطیانو سره یې پر اړیکو شننه شوې ده. پنځم څپرکی د پاکستان د فډرالي قبایلي سیمو ته ځانګړ شوی دی. د دې ترڅنګ پر خیبر، کورمه، باجوړ او مومند دره هم بحث شوی دی. شپږم څپرکی یې د شمال لوېدیځ ولایت پښتونخوا ته ځانګړی شوی دی. اووم څپرکی د پاکستان په سویل لوېدیځ ولایت بلوچستان کې د افغان طالبانو پر پټنځایونو راڅرخي. له کلونو ویل کېږي چې د طالبانو رهبري شورا په کوټه کې ده، خو داسې لږ رښتیني ګامونه اخیستل شوي، چې دا هرڅه روښانه کړي. دا څپرکی په دې اړه جالب بحث لري.
د دغه کتاب درېیمه برخه افغانستان ته ځانګړې شوې ده. دری واړه څپرکي یې د پښتنو پر کلیوالو سیمو بحث کوي. اتم څپرکی ختیځ کې د لوی ننګرهار په اړه خبرې کوي. نهم څپرکی د افغانستان په سویل ختیځ کې د لویې پکتیا په اړه دی، دا هغه سیمه ده چې د ډیورنډ کرښې ترڅنګ له فاټا سره نښتې ده. لسم څپرکی د افغانستان په سویل لوېديځ کې د طالبانو د راپورته کېدو په اړه دی. په دغه څپرکي کې د طالبانو ایډیالوژي، نړۍ لید، سازمان او ستراتیژي تشریح شوې ده. د کتاب وروستی څپرکی د سولې تګلارې ته ځانګړی شوی دی.
دغه کتاب تازه پښتو ته ژباړل شوی. د کتاب لیکوال ابوبکر صدیق او ژباړه یې محمد اقا قریشي کړې ده، چې ټولټال د څلورو برخو په درلودو سره په ۲۷۲ مخونو کې راټول شوی دی.
مینه وال کولای شي دغه کتاب له اکسوس او د ښار له نورو لویو کتابپلورنځیو څخه په مناسب قېمت تر لاسه کړي.
څنګه کېدلای شي چې نور د پښتون بچی په یو او بل نوم ونه وژل شي؟ پښتانه څنګه د نورو ملتونو په څېر په سوله او امنیت کې ژوند کولای شي؟ دې او دېته ورته نورو پوښتنو ته په دغه کتاب کې ځوابونه ویل شوي.
