غرجستان پوهنتون په ۱۳۸۸ لمریز کال کې له لوړو زده کړو وزارت څخه د فعالیت جواز تر لاسه کړی او د څلورو پوهنځیو او اتو ډېپارټمنټونو په درلودلو سره یې په ۱۳۸۹ لمریز کال کې عملاً پر فعالیت پیل کړی دی. د غرجستان پوهنتون رییس ښاغلی ډاکټر ناصر علي رحماني وایي، پوهنتون یې له هماغه لومړي سره تر اوسه پورې څلور پوهنځي (حقوق او سیاسي علوم، کمپیوټر ساینس، اجتماعي علوم او اقتصاد) لري چې هر پوهنځی یې بیا په خپل چوکاټ کې دوه دوه ډېپارټمنټونه لري. ښاغلی رحماني وایي، کمپیوټرساینس پوهنځی یې د (معلوماتي ټکنالوژۍ او سافټویر انجنیرېنګ)، اقتصاد پوهنځی یې (تجارتي اقتصاد او مدیریتي اقتصاد)، حقوقو پوهنځی یې (نړیوال حقوق او نړیوالې اړیکې) او دغه راز په اجتماعي علومو پوهنځي کې بیا د (جامعه شناسۍ) ډېپارټمنټونه لري. غرجستان پوهنتون په فراه ولایت کې هم یوه څانګه لري، چې د ښاغلي رحماني په خبره، هغه څانګه یې له یادو شویو پوهنځیو سره سره، د انجنیري پوهنځی هم لري، چې عملاً محصلین پکې لوړې زده کړې کوي.
لږ تر لږه لس کاله کېږي چې غرجستان پوهنتون د لوړو زده کړو په برخه کې کار کوي. د دغه پوهنتون رییس ناصر علي رحماني وایي، د کلونو په اوږدو کې یې د محصلینو شمېر توپير درلود . نوموړی وایي، اوسمهال د دوو زرو په شاوخوا کې محصلین لري، چې شپېته سلنه یې نارینه او څلوېښت سلنه یې ښځینه محصلین دي. د رحماني په خبره، یوه دوره محصلین د سهار له اتو د غرمې تر دوولسو بجو او بله دوره هم د مازدیګر له څلورو د شپې تر اوو یا اتو بجو پورې د زده کړو لپاره ورځي.
ښاغلی رحماني وایي، ټول هغه شرایط یې پوره کړي چې لوړو زده کړو وزارت په یوه پوهنتون کې د ماسټرۍ لپاره ټاکلي دي، چې په هغه کې د پوهنځیو شمېر، د علمي کادر موجودیت او یا هم نور معیارونه دي. دی وایي، ان له ۱۳۹۵ لمریز کال را پدېخوا یې څو څو ځله لوړو زده کړو وزارته غوښتنلیکونه سپارلي، څو په ځینو پوهنځیو کې ورته د ماسټرۍ پروګرام د پیلېدو جوازونه ورکړي، خو لا هم پر دې چاره نه دي بریالي شوي. رحماني وایي، اوس یې هم لومړنۍ غوښتنه همدا ده چې په ځینو پوهنځیو کې د ماسټرۍ پروګرام پیل کړي.
د دغه پوهنتون رییس وایي، تر اوسه پورې یې له خپلو فعالو پوهنځیو څخه اووه دورې محصلین فارغ کړي، چې شمېر به یې ۲۰۰۰ کسانو ته رسېږي. هغه وایي، ټول فارغ شوي محصلین یې د دندو څښتنان دي او یا هم بهر ته د نورو لوړو زده کړو لپاره تللي دي. د رحماني په خبره، دا چې دوی په کال کې دوه ځله کانکور ازموینه اخلي او په کال کې د ۱۰۰۰ نویو محصلینو د جذب وړتیا لري، خو بیا هم د پنځو یا شپږو سوو کسانو په شاوخوا کې نوي محصلین جذبوي.
د رحماني په خبره، په ټوله کې د محصلینو لپاره تخفیف په پام کې نیول شوی دی، خو بیا هم هغه کسان چې د لوړو زده کړو وزارت لخوا دوی ته ور معرفي کېږي،له شل تر پنځه ویشت سلنې پورې تخفیف ورکوي. دغه راز هغه کسان چې بېوزله دي او نه شي کولی خپلو لوړو زده کړو ته ادامه ورکړي، غرجستان پوهنتون ورته ځانګړی تخفیف ورکوي. د دغه پوهنتون رییس وایي، غرجستان پوهنتون د نورو خصوصي پوهنتونونو په کتار کې هغه پوهنتون دی، چې په ټوله کې له محصلینو لږ فیس اخلي. رحماني وایي، یوازې کمپیوټر ساینس پوهنځی چې یو څه ډېر امکانات لري او معلومه خبره ده چې ښه امکانات په ښو پیسو برابرېږي، نو فیس یې د نورو پوهنځیو په پرتله یو څه زیات دی. د نورو پوهنځیو لپاره یې مناسب فیسونه ټاکلي، چې محصلین یې د پرېکولو وړتیا لري او کولی شي خپلې لوړې زده کړې مخ ته یوسي.
غرجستان پوهنتون ۲۸ دایمي استادان لري، چې له ډلې یې شپږ ښځینه او پاتې نور نارینه استادان دي، چې ډېری یې د دوکتورا تر کچې پورې لوړې زده کړې لري. رحماني وایي، ډېر لږ استادان یې د ماسټرۍ تر کچې پورې لوړې زده کړې لري، چې هغوی هم اوس عملاً په کور د ننه او بهر کې د دوکتورا په پروګرامونو کې شامل دي.
غرجستان پوهنتون د خپلو محصلینو لپاره مجهز کتابتون لري. د دغه پوهنتون رییس وایي، هڅه یې کړې ده چې د هر پوهنځي او هر ډېپارټمنټ لپاره اړوند ټول کتابونه برابر کړي، څو محصلین ترې د مطالعې لپاره ګټه واخلي. ښاغلی رحماني وایي، اوس تازه یې هڅې پیل کړې دي، چې د فزیکي کتابتون تر څنګ، د خپلو محصلینو لپاره یو ډیجیټالي کتابتون هم برابر کړي، څو محصلین وکولی شي په هر ځای کې چې وي، په انلاین بڼه د خپلې خوښې کتابونه په کتابتون کې ولټوي او مطالعه یې کړي.
د دغه پوهنتون رییس وایي، په ۱۳۹۶ لمریز کال کې لوړو زده کړو وزارت د خصوصي پوهنتونونو لپاره چې کوم معیارونه په پام کې نیولي وو، څو د دغو پوهنتونونو فارغ شویو محصلینو ته دولتي ډیپلومونه وویشي، غرجستان پوهنتون پنځم خصوصي پوهنتون و، چې دغه معیارونه یې پوره کړل او دولتي ډیپلومونه یې تر لاسه کړل. اوس دغه پوهنتون خپلو فارغېدونکو محصلینو ته دولتي ډيپلومونه ویشي، چې محصلین کولی شي له ټولو حقونو یې برخمن شي. دوی کولای شي له اسنادو یې د دندې په پیدا کولو او دغه راز د لا نورو لوړو زده کړو د پر مخ بېولو لپاره ګټه واخلي.
د کتابتون او انټرنېټ تر څنګ، غرجستان پوهنتون د خپلو محصلینو لپاره د پوهنتون د ننه ډېر نور امکانات هم لري. د دغه پوهنتون رییس وایي، په پوهنځیو کې د عملي زده کړو تر څنګ، د محصلینو لپاره د ژبې او کمپیوټر زده کولو، انټرنېټ او لوبو په برخه کې هم امکانات لري، چې محصلین کولی شي د خپلو وړتیاوو د لوړولو لپاره ترې ګټه واخلي. ښاغلی رحماني وایي، د ښځینه محصلینو لپاره یې له دې مخکې لیلیه هم درلوده چې له بدغه مرغه څه موده وړاندې د ځینو ستونزو له کبله وتړل شوه. دی وایي، د راتلونکي خزاني سمیسټر لپاره به هڅه وکړي، چې د ښځینه محصلینو لپاره یو ځل بیا دغه لیلیه برابره کړي، ځکه په خبره یې، ډېری ښځینه محصلینې یې د لرې پرتو ولایتونو دي.
د غرجستان پوهنتون اداره وایي، د پوهنتون د لا پرمختګ لپاره ډېر پلانونه لري، چې یو په بل پسې به یې عملي کوي. د دغه پوهنتون رییس وایي، لومړنۍ هڅه به یې دا وي چې د لوړو زده کړو وزارت لخوا ټول ټاکل شوي معیارونه پوره او د محصلینو لپاره ټول هغه امکانات برابر کړي، چې د دوی اړتیا بلل کېږي. دغه راز به هڅه وکړي چې په کابل ښار کې له ډېرو سکټوري ادارو سره په اړیکه کې شي، څو د محصلینو د عملي زده کړو لپاره هم زمینه برابره کړي او وکولی شي تر فراغت وروسته، ډېر ژر د خپلو محصلینو لپاره دنده پیدا کړي.
د غرجستان پوهنتون اداره له لوړو زده کړو وزارت څخه غواړي، چې لومړی خو ټول هغه معیارونه چې د خصوصي پوهنتونونو او لوړو زده کړو موسسو لپاره په پام کې نیول شوي دي، په یو شان په ټولو پوهنتونونو کې عملي کړي او تر څنګ یې لوړو زده کړو وزارت اړ دی چې د خصوصي پوهنتونونو د پایښت او پرمختګ لپاره، له دغو پوهنتونونو سره هر اړخیزه همکاري وکړي او د پرمختګ زمینه ورته برابره کړي. دی زیاتوي، د خصوصي پوهنتونونو لپاره د دایمي ځایونو نشتون او د زیاتې مالیې اخیستل هم هغه څه دي، چې د خصوصي پوهنتونونو د هر اړخیز پرمختګ مخه یې نیولې ده. د دغه پوهنتون رییس وایي، دوه اړخیزه همکاري کولی شي د خصوصي پوهنتونونو د پر پښو درېدو او پرمختګ لامل شي او د نورې نړۍ په څېر خصوصي پوهنتونونه په افغانستان کې هم خپل ځای او اعتبار پیدا کړي.
