د راپورونو له مخې، د روسیې په سن پټرزبورګ ښار کې په یوه روغتون کې د اورلګېدنې له کبله پنځه تنه مړه شوي دي.
روسي رسنیو ویلي چې دغه اورلګېدنه د یاد ښار په سووتوا ګورګي روغتون کې رامنځته شوې او ۱۵۰ نور کسان یې ژغورل شوي دي.
د دغه هېواد د قضایي څېړنو ادارې ویلي چې اورلګېدنه د مصنوعي تنفس د یوه ماشین له کبله رامنځته شوې او یاد پنځه کسان هم د سخت دود او اوکسېجن د کموالي له کبله مړه شوي دي.
چارواکو ویلي چې دغه روغتون په سن پټرزبورګ ښار کې د د کرونا ویروس د ناروغانو لپاره ځانګړی شوی چې په بشپړه توګه له منځه تللی دی. دا په داسې حال کې ده چې تر دې وړاندې هم په روسیه کې د کرونا ویروس لپاره په ځانګړو شویو روغتونو کې اورلګېدنې ګڼو کسانو ته مرګ ژوبله اړولې ده.
بلخوا د روسیې د بېړنیو پېښو سره د مبارزې ادارې ویلي چې وړمه ورځ د دغه هېواد په پلازمېنه مسکو کې د بوډا کسانو د ساتنې په یوه مرکز اورلګېدنې ۱۸ کسانو ته مرګ ژوبله اړولې ده. د سرچینې په خبره، په پېښه کې ۹ تنه مړه شوي او ۹ نور ټپیان شوي دي.
