مرادوف: ژر به د ټاپي پروژې رغنیزې چارې پیل شي

د ترکمنستان د بهرنیو چارو وزیر رشید مرادوف ویلي چې هېواد یې په اوسنیو سختو شرایطو کې د افغانانو ترڅنګ ولاړ دی او دوی به له دغه هېواد سره خپلو پراخو او بشردوستانه مرستو ته دوام ورکړي. نوموړي دا څرګندونې نن په ارګ کې د ا.ا له رییس الوزرا محمد حسن اخند سره په لیدنه کې کړې دي. په همدې اړه خپرې شوې خبرپاڼه کې راغلي چې مرادوف دغه راز په دوه استقامتونو کې د ترکمنستان او جوزجان او ترکمنستان ــ هرات پورې د ريل پټلۍ د جوړيدو ژمنه هم کړې ده چې کار به يې ژر پيل شي. هغه ویلي چې له ترکمنستان څخه تر هرات پورې به د ۵۰۰ ولټه بريښنا د انتقال لپاره هم د نوی لين پر جوړيدو کار پیل شي، تر څو د بریښنا انتقال ته زمینه برابره شي. نوموړي همدا راز د افغانستان د بهرنیو چارو وزارت له سرپرست امیر خان متقي سره هم لیدلي دي او زیاته کړې یې ده چې ترکمنستان له افغانستان سره د هر اړخيزو اړيکو پياوړي کولو او دوامداره همکاريو ته چمتو دی.