ملګري ملتونه وایي په افغانستان کې یې د بشردوستانه مرستو لپاره شاوخوا ۶۰۰ میلیونه ډالر راټول کړي دي. د ملګرو ملتونو د بشري مرستو د همغږۍ ادارې یا اوچا په تازه څرګندونو کې ویلي چې دوی له افغانستان سره بشردوستانه مرستو ته ژمن دي او هڅه کوي پر وخت اړمنو ته خپلې مرستې ورسوي.
سرچینه وايي چې دوی دمګړی ټولټال ۶۰۰ میلیونه ډالر د بشردوستانه مرستو لپاره راټول کړي دي چې د روان میلادي کال تر پایه به یې مرستې اړمنو ته ورسېږي. اوچا زیاتوي چې په افغانستان کې د بانکي سیستم ستونزو دوی ته د مرستو رسونې په برخه کې خنډونه جوړ کړي خو هڅه کوي له بدیلو لارو کار واخلي. دوی وايي چې په دې پیسو به شاوخوا یوولس میلیونه اړمنو افغانانو ته بشري مرستې ورسوي.
